IDI mangrugin nga umadu ti tao ditoy daga, kaaduan ti nagaramid ti dakes kas ken Cain. Ngem adda maysa a lalaki a naiduma. Daytoy a lalaki ti agnagan Enoc. Natured a lalaki ni Enoc. Intultuloyna ti nagserbi iti Dios.

Ammom kadi no apay dagidiay a tattao idi ti nagaramidda ti adu a kinadakes? Panunotem, Asino kadi ti nakagapu ti isusukir da Adan ken Eva iti Dios? Wen, isu ti dakes nga anghel. Ti Biblia nagananna dayta ti Satanas. Kayatna amin nga agbalin a dakes.

Maysa nga aldaw impaibaga ni Jehova a Dios ken Enoc kadagiti tattao ti maysa a banag a dida kayat a denggen. Isu daytoy: ‘Addanto aldaw a dadaelen ti Dios amin a dakes a tattao.’ Mabalin a makapungtot dagiti tattao a nakangngeg iti daytoy. Isu a masapul nga agbalin a natured ni Enoc.

Saan a pinagbiag ti Dios ni Enoc ti mabayag a kadua dagidiay dakes a tattao. Nagbiag laeng ni Enoc ti 365 a tawtawen. Pudno, dagiti tattao kadagidiay nga al-aldaw atatiddog ti biagda ngem itatta. Ni Matusalem nga anak ni Enoc ti nagbiag ti 969 a tawtawen!

Kalpasan ti ipapatay ni Enoc, dumakes a dumakes dagiti tattao. Kuna ti Biblia a ‘ti daga napunno ti kinaranggas.’

Ammom kadi ti maysa kadagiti rason nga adut’ riribok kadagidiay nga al-aldaw? Wen ta ni Satanas adda baro a pamay-anna a mangpaaramid ti dakes kadagiti tattao. Daytoy ti sumaganad a maammuantayo.