GINDING aga ntsa hta masha ni law htam wa ai hte maren, shanhte kaw na law malawng ka-in zawn nhkru ai amu hpe galaw ma ai. Raitimung lak lai ai masha langai mi nga ai. Dai wa gaw Enuk mying ai, ndai wa re. Enuk gaw magrau grang ai masha langai mi re. Shi a makau grup yin e nga ai masha ni yawng gaw nhkru ai amu hpe galaw ma ai. Raitimung Enuk gaw matut nna, karai Kasang hpe nawku ai.

Dai prat e nga ai masha ni gaw nshawp ai amu amyu shagu hpe, hpa majaw galaw ma ai lam chye ma ni? Myit yu u. Adam hte Awa yan Karai Kasang aga n madat na hte, hkum sha mu nga nna hkum pat da ai namsi hpe sha na matu kadai wa galaw dat a ni? Teng ai. Nhkru ai lamu kasa langai mi re. Chyum Laika hta shi hpe Satan nga nna shamying da ai. Masha hkum shagu hpe nkaja ai amu hpe galaw hkra myit shadut ya nga ai.

Lanyi mi hta e, Karai Kasang gaw Enuk hpe, masha ni n ra ai shi ga hpe tsun shangun ai: ‘ Nshawp ai masha ni yawng hpe lani mi na nhtoi hta, Karai Kasang jahten kau na re,’ nga ai shi ga re. Dai shi ga hpe masha ni na ma ai shaloi masin grai pawt mayu na ma ai. Enuk hpe sat kau na hku pyi myit na ma ai. Dai majaw Karai Kasang hpa galaw na ra ai lam masha ni hpe tsun na matu, Enuk gaw magrau grang ai myit rawng ra ai.

Karai Kasang gaw Enuk hpe nhkru ai masha ni a lapran e, aten na na asak nhkrung shangun mayu ai. Enuk gaw shaning 365 ning sha asak hkrung ai. “Shaning 365 sha” nga nna hpa majaw tsun ai kun? Hpa majaw nga yang dai aten na masha ni gaw ndai prat na masha ni hta grau nna, n-gun lapyin rawng ma ai hte asak mung grau nna glu ma ai. Enuk a kasha Mahtusala gaw, 969 ning asak hkrung ai.

Enuk si mat wa ai hpang e, masha ni gaw grau nna nhkru jat wa ai. ‘Shanhte a myit mang ai lam yawng gaw aten shagu nhkru ai hkrai rai nga ai’. ‘Ginding aga gaw kashun kashe re ai hte, hpring nga ai,’ nga nna Chyum laika hta tsun tawn ai.

Dai ban prat hta ga ntsa e, jam jau grai law ai lam langai mi nga ai. Hpa majaw re ai hpe chye a ni? Shinggyim masha ni hpe nkaja ai amu galaw na matu myit shadut ya ai hta, Satan gaw lam masa nnan langai mi hpe mu lu ai majaw re. Ndai lam hpe hpang na laika hta hti yu ga.