Ngewa ya 7: Mũndũ Ngũmbaũ
YĨLA andũ maendeeie kwongeleka ĩũlũ wa nthĩ, aingĩ moo meekaa maũndũ mathũku o ta Kaini. No kwaĩ mũndũ ũmwe waĩ kĩvathũkany’o. Nake eetawa Enoko. Enoko aĩ mũndũ ngũmbaũ. Andũ onthe ala maĩ kw’o ĩvinda yake, meekaa maũndũ mathũku mũno, ĩndĩ Enoko aendeeie na kũmũthũkũma Ngai.
We nĩwĩsĩ nĩkĩ andũ asu ma ĩvinda yĩu meekaa maũndũ maingĩ mathũku? Kwasũanĩa, nũũ watumie Atamu na Eva malea kũmwĩw’a Ngai na maya ĩtunda yĩla Ngai waĩtye maikaye? Ũsu aĩ mũlaĩka mũthũku. Mbivilia ĩmwĩtaa Satani. Nake aendee kũtata kũvĩndũa kĩla mũndũ atw’ĩke mũthũku.
Mũthenya ũmwe Ngai nĩwamwĩie Enoko atavye andũ ũndũ matendaa kwĩw’a. Amwĩie amatavye ũũ: ‘Mũthenya ũmwe wũkĩte Ngai akaananga andũ onthe ala athũku.’ Nĩvatonyeka andũ asu nĩ meewie woo kwĩw’a ũvoo ũsu. O na no kwĩthĩwa matatie kũmũaa Enoko. Kwoou Enoko aaĩlĩte kwĩthĩwa na ũkũmbaũ wa kũtavya andũ ũndũ Ngai wakilĩlye kwĩka
Ngai ndaaeka Enoko ekale katĩ wa andũ asu athũku ĩvinda yĩasa. Enoko ekalile o myaka 365. Nĩkĩ tũkwasya “o myaka 365”? Kĩtumi nũndũ andũ ma ĩvinda yĩu maĩ na mĩĩ yĩna vinya kwĩ ũmũnthĩ na nĩmekalaa ĩvinda yĩasa mũno. Methusela mwana wa Enoko ekalile myaka 969
Ĩtina wa Enoko kũkw’a, andũ nĩmaendeeie na kũthũka. Mbivilia yaasya ‘ũndũ w’onthe ũla masũanĩaa ĩũlũ waw’o waĩ o mũthũku mavinda onthe,’ na ‘nthĩ yausũĩte ũng’endu.’
We nĩwĩsĩ nĩkĩ kwaĩ na ũthũku mwingĩ ĩvinda yĩu? Kĩtumi nũndũ Satani aĩ na nzĩa ĩngĩ nzaũ ya kũtuma andũ meka maũndũ mathũku. Twĩĩmanyĩsya ĩũlũ wa ũndũ ũsu ĩsomonĩ yĩla yĩatĩĩe.
Mwambĩlĩlyo 5:21-24, 27; 6:5, 11-13; Aevelania 11:5; Yuta 14, 15.
Makũlyo
- Enoko aĩ kĩvathũkany’o ata?
- Nĩkĩ andũ ĩvinda ya Enoko meekaa maũndũ maingĩ mathũku?
- Nĩ maũndũ maũ mathũku andũ mekaa? (Sisya visa.)
- Enoko aaĩlĩte kwĩthĩwa e ngũmbaũ nĩkĩ?
- Andũ mĩthenyanĩ ĩsu mekalaa ĩvinda yĩana ata, na Enoko ekalile ĩvinda yĩana ata?
- Kweekĩkie ata Enoko amina kũkw’a?
Makũlyo ma kwongeleela
- Soma Mwambĩlĩlyo 5:21-24, 27.
Enoko aĩ na mũamba ũilyĩ ata vamwe na Yeova? (Mwa. 5:24)
Kwosana na Mbivilia nĩ mũndũ wĩva ũla wekalile ĩvinda yĩasa vyũ, na aĩ na ũkũũ wa myaka yĩana aikw’a? (Mwa. 5:27)
- Soma Mwambĩlĩlyo 6:5.
Maũndũ mekalile ata ĩũlũ wa nthĩ ĩtina wa Enoko kũkw’a? (2 Tim. 3:13)
- Soma Aevelania 11:5.
Nĩ ũseo mwaũ wa Enoko ũla “wendeeisye Ngai,” naw’o waetie kyaũ? (Mwa. 5:22)
- Soma Yuta 14, 15
Ũmũnthĩ Aklĩsto matonya ata kwĩthĩwa na ũkũmbaũ ta wa Enoko yĩla mekũelesya andũ ĩũlũ wa kaũ ũla wũkĩte wa Ali-Maketoni? (2 Tim. 4:2; Aevl. 13:6)
