LEILUNGA mite an lo punin, a tam ber Kaina angin thil tha lo an ti a. Mahse mi pakhat chu a danglam bik a Enoka an tih he mi hi a ni. A vela mite zawng zawng chuan thil tha lo em em an ti a, mahse Enoka chuan Pathian rawng a la bawl zel a.

Chutih laia mite chuan thil tha lo chu zozai chu an tih chhan i hria em? Aw le, ngaihtuah teh, Tuin nge Adama leh Evi Pathian thu awih lo tur leh Pathianin an ei tur a ni lo a tih theirah chu ei tura tir? Vantirhkoh tha lo a ni. Bible chuan Setana a vuah. Mi tin hi that lohtir a tum a ni.

Ni khat chu Pathian Jehovan Enoka chu mite ngaihthlak duh loh zawng thil engemaw a hrilhtir a. Hei hi a ni: ‘Eng niah emaw Pathianin mi tha lo zawng zawng a tiboral dawn,’ tih hi. Chu chu an hriatin mipui chu an thinur em em mai thei. Enoka tihhlum hial pawh an tum thei. Chuvangin Pathianin a tih tur chanchin mite hrilh turin Enoka chuan huai em em a mamawh a ni.

Pathianin Enoka chu chung mi tha loho zingah chuan rei tak a chentir lo. Enoka chu kum 365 chauh a dam. Engvanginnge “kum 365 chauh“ kan tih? Chung laia mite chu tun ai hian an chak zawk daih a, an dam rei zawk vang a ni. E, Enoka fapa Mathusela chu kum 969 a dam a sin!

Enoka thih hnuah chuan mite chu an tha lo zual deuh deuh va. Bible chuan ‘an ngaihtuah tinreng chu a tha lo va,’ ‘leilung chu pawngneknain a khat‘ a ti.

Chung laia leilunga chuti zozai buaina a awmna chhan pakhat i hria em? Mipuite chu Setanan thil tha lo tihtir dan kawng thar a neih vangin a ni. Chu mi thu chu hemi zawhah hian kan zir ang.