TÁ NI̱XI̱YO ku̱a̱ʼáka na̱ yiví nu̱ú Ñuʼú yóʼo ku̱a̱ʼá na̱yóʼo xi̱keʼé ña̱ va̱ása va̱ʼa táʼan ña̱ xi̱keʼé ta̱ Caín. Soo ni̱xi̱yo iin ta̱a ta síín ni̱xi̱yora nu̱ú ndiʼina. Ta̱yóʼo Enoc xi̱naníra ta ndakú ni̱xi̱yo-inira. Na̱ yiví na̱ ni̱xi̱yo kán ku̱a̱ʼá ña̱ kini xi̱keʼéna ta ta̱ Enoc síín ni̱xi̱yora chi xi̱kachíñura nu̱ú Ndióxi̱.

¿Á xíni̱ún ndachun xi̱keʼéka na̱ yiví kán ña̱ kini? Ndakanixi̱ní xa̱ʼa ña̱yóʼo: ¿Ndáana sa̱ndáʼvi ta̱ Adán xíʼin ñá Eva ña̱ kǒo níxiniso̱ʼona ña̱ ni̱ka̱ʼa̱n Ndióxi̱, ta xa̱xína ku̱i̱ʼi á ña̱ʼa ndaʼa̱ yitu̱n tú ni̱ka̱ʼa̱nra xíʼinna va̱ása kaxína? Iin ta̱ ángel ta va̱ása va̱ʼa kúú ta̱ sa̱ndáʼvi na̱yóʼo. Tu̱ʼun Ndióxi̱ káʼa̱nña xíʼinyó ña̱ naníra ta̱ Ndi̱va̱ʼa. Ta̱kán kúú ta̱ kúni̱ ndiʼiyó ná keʼé ña̱ va̱ása va̱ʼa.

Iin ki̱vi̱ Jehová ni̱ka̱ʼa̱nra xíʼin ta̱ Enoc ná ka̱ʼa̱nra xíʼin na̱ yiví iin ña̱ʼa ña̱ kǒo kúni̱na kuniso̱ʼona. Ña̱yóʼo kúú ña̱ ni̱ka̱ʼa̱nra: ‘Ki̱xa̱a̱ iin ki̱vi̱ Ndióxi̱ sandiʼi-xa̱ʼara ndiʼi na̱ kéʼé ña̱ kiniʼ. Ta sana ni̱sa̱a̱ na̱ yiví tá ni̱ka̱ʼa̱nra ña̱yóʼo xíʼinna. Sana xi̱kuni̱na kaʼnína ta̱ Enoc. Ña̱kán ta̱ Enoc iin ta̱a ndakú-ini xi̱kuura ta ni̱ka̱ʼa̱nra xíʼinna ña̱ ni̱ka̱ʼa̱n Ndióxi̱ kixi nu̱úna.

Loʼova tiempo ta̱xi Ndióxi̱ ña̱ ni̱xi̱yo ta̱ Enoc xíʼin na̱ yiví kini. Ni̱xi̱yo kuitíra 365 ku̱i̱ya̱. ¿Ndachun káʼa̱nyó ni̱xi̱yo “kuitíra 365 ku̱i̱ya̱”? Saáchi na̱ yiví na̱ ni̱xi̱yo tiempo xi̱naʼá ndakúka ni̱xi̱yona ta ku̱a̱ʼáka ku̱i̱ya̱ xi̱takuna nu̱ú na̱ ndóo vitin. Ta̱ Matusalén se̱ʼe ta̱ Enoc ni̱xi̱yora 969 ku̱i̱ya̱.

Tándi̱ʼi ni̱xi̱ʼi̱ ta̱ Enoc na̱ yiví kán nina ña̱ kini xi̱keʼékana. Tu̱ʼun Ndióxi̱ káʼa̱nña ‘ndiʼi tiempo nina ña̱ kini xi̱ndakanixi̱nína, ña̱kán nda̱kutú nu̱ú Ñuʼú yóʼo xíʼin ña̱ kiniʼ.

¿Á xíni̱ún ndáa xa̱ʼa kúú ña̱ ni̱xi̱yo ku̱a̱ʼáka ña̱ kini tiempo saá? Saáchi ta̱ Ndi̱va̱ʼa íyoka inka ña̱ʼa xi̱niñúʼura ña̱ sa̱ndáʼvira na̱ yiví. Ná kotoyó ndáaña kúú ña̱ xi̱niñúʼura.