HE KAMATA e numera he tau tagata he lalolagi ke tupu, ko e laulahi ha lautolu ne taute e tau mena kelea tuga a Kaino. Ka e taha e tagata taane ne kehe lahi. Ko e tagata anei ne higoa ko Enoka. Ko Enoka ko e tagata taane malolō. Ko e tau tagata ne viko takai ia ia ne taute e tau mena kelea lahi, ka e tumau ni a Enoka ke fekafekau ke he Atua.

Iloa nakai e koe ko e ha e tau tagata he vahā ia ne loga lahi e tau mena kelea ne taute? Ka e manamanatu la, Ko hai ne fekau a Atamu mo Eva ke liuliu ke he Atua mo e ke kai e fua he akau ne pehē e Atua ke ua kai? E, ko e agelu kelea. Ne fakahigoa he Tohi Tapu a ia ko Satani. Ti kua lali a ia ke kelea foki e tau tagata oti.

Taha aho ne fekau e Iehova ko e Atua a Enoka ke tala age ke he tau tagata e taha mena ne nakai manako a lautolu ke logona. Ko e mena nei: ‘To moumou he Atua e tau tagata kelea oti he taha aho.’ Kua liga ita lahi e tau tagata ka logona e mena nei. Ti liga lali a lautolu ke kelipopo a Enoka. Kua lata a Enoka ke loto malolō lahi ke tala age ke he tau tagata e mena ne amanaki e Atua ke taute.

Ne nakai fakaatā he Atua a Enoka ke moui loa mo e tau tagata kelea ia. Ne moui a Enoka ke 365 ni e tau. Ko e ha ne pehē a tautolu ko e “365 ni e tau”? Kakano ha ko e tau tagata taane he vahā ia kua to lahi e malolō mo e momoui loloa. Ne moui e tama taane ha Enoka ko Metusela ke 969 e tau!

Moha ia, magaaho ne mate a Enoka, kua holo ni ki mua e kelea he tau tagata. Ne tala mai he Tohi Tapu ‘ko e tau fatuakiloto oti ha lautolu kua kelea hokoia ni ke he tau magaaho oti,’ ti kua ‘puke e lalolagi he favale.’

Iloa nakai e koe taha kakano ko e ha ne loga koa ai e tau lekua he lalolagi he vahā ia? Pihia ni ha kua fai puhala foou a Satani ke fakaohooho aki e tau tagata ke taute mena kelea. To fakaako a tautolu ke he mena nei he vala i mua.