TAEM pipol start for kamap staka long earth, plande long olketa duim olketa nogud samting olsem Cain. Bat wanfala man hem difren. Hem nao disfala man Eʹnoch. Eʹnoch hem wanfala man wea no fraet. Pipol wea stap raonem hem duim olketa samting wea nogud tumas, bat Eʹnoch gohed for servem God.

Waswe, iu savve why nao evri pipol long datfala taem duim plande nogud samting? Tingim diswan, Hu nao mekem Adam and Eve for no obeyim God and for kaikaim frut wea God sei olketa mas no kaikaim? Ia, hem wanfala nogud angel. Bible kolem hem Satan. And hem trae for mekem evriwan for kamap nogud.

Wanday Jehovah God askem Eʹnoch for talem wanfala samting long pipol hia wea olketa no want for herem. Hem sei: ‘Gogo, God bae finisim evri nogud pipol.’ Olketa pipol hia kros fogud for herem diswan. Maet olketa trae for killim dae Eʹnoch tu. So Eʹnoch mas no fraet for talem pipol samting wea God bae duim.

God no letem Eʹnoch for laef for longfala taem midolwan long nogud pipol hia. Eʹnoch hem laef for 365 year nomoa. Why nao iumi sei “365 year nomoa”? From olketa man long datfala taem olketa moa strong and laef for longfala taem winim olketa man distaem. Tru nao, son bilong Eʹnoch, Me·thuʹse·lah hem laef for 969 year!

Bihaen Eʹnoch hem dae, pipol hia kamap moa worse. Bible hem sei ‘evri samting wea olketa tingting abaotem hem nogud evritaem,’ and ‘earth hem fulap witim raf fasin.’

Waswe, iu savve wanfala reason for why nao plande trabol stap long datfala taem? Hem from Satan garem wanfala niu wei for mekem pipol duim olketa nogud samting. Diswan nao nextfala samting wea iumi bae lane abaotem.