CHIʼ e kʼi chi ri winaq cho ruwäch Ulew, e kʼi chike xkebʼan ri itzelal junam rukʼ Caín. Tekʼuriʼ kʼo jun achi junam ta kukʼ wariʼ. Ubʼiʼ Enoc. Areʼ jun achi nim ranimaʼ xuqujeʼ nim uchoqʼabʼ. Ronojel e kʼo che unaqaj konojel e itzel täq winaq, tekʼuriʼ Enoc tijan kuya uqʼij ri Jehová.

¿La awetaʼm suche ri täq winaq riʼ kkebʼan kʼi täq itzelal? Chachomaj wariʼ: ¿Chin laʼ xubʼan che Adán rukʼ Eva che xeniman ta che ri Ajawaxel xuqujeʼ xketij ri uwäch cheʼ, che ubʼim ri Ajawaxel che kketij täj? Are jun itzel ángel. Ri Loqʼalaj Pixabʼ kubʼij Satanás che. Satanás kraj kubʼan itzel chike konojel winaq.

Xopan jun qʼij che ri Ajawaxel Jehová xutaq ri Enoc che ubʼixik chike ri winaq, jun tzij che qas kekaj täj kketo. Are wariʼ: ‹Kopan na jun qʼij che ri Ajawaxel kusach kiwäch konojel ri itzel täq winaq›. Wariʼ xubʼan chike ri winaq che sibʼalaj xpe kiwal. Xkaj xkekamsaj ri Enoc. Rumal waʼ ri Enoc rajawaxik che xuxibʼij ta ribʼ rech kubʼij chike ri winaq su kubʼan ri Ajawaxel.

Ri Ajawaxel xuya ta che ri Enoc che xkʼaseʼ kʼi täq junabʼ che kixoʼl ri itzel täq winaq. Rumal laʼ xiw xkʼaseʼ 365 junabʼ ¿Suche kqabʼij xiw xkʼaseʼ «365 junabʼ»? Ojer ri winaq sibʼalaj kʼo kichoqʼabʼ che kiwäch ri winaq kimik xuqujeʼ kekʼaseʼ kʼi täq junabʼ. ¡Ri Matusalén ukʼojol ri Enoc xkʼaseʼ 969 junabʼ!

Chiʼ kamnäq chi ri Enoc, ri winaq xkebʼan sibʼalaj e itzel. Ri Loqʼalaj Pixabʼ kubʼij ‹ronojel ri kkechomaj ri winaq are ubʼanik ri itzelal›, rumal laʼ ‹cho ronojel uwäch Ulew kʼo itzelal›.

¿La awetaʼm suche kʼo sibʼalaj kʼi täq chʼoj ojer? Rumal che Satanás xpe jun kʼakʼ chomanik, o pensar pa ujolom su kubʼano rech keʼubʼan itzel chike ri winaq. Chqilaʼ sulaʼ.