KAY Pachapi runakuna miraruptinku Cainpa rurasqanman hina kawsakurqaku. Huk runam ichaqa mana paykuna hinachu karqa. Chay runaqa Enoc sutiyoqmi karqa. Payqa kallpanchakuspa qarinchakuq runam karqa. Runamasinkunaqa mana allinllataña ruraptinkupas Enocqa hinallam Diosta servirqa.

¿Yachankichu imanasqataq chay runakuna mana allinllataña ruraq karqaku? Yuyariy: ¿Pitaq Adantawan Evata engañarqa Diosta mana kasukuspanku sachapa rurunta mikunankupaq? Mana allin angelmi chayta rurarqa. Bibliaqa Satanas, nispam sutichan. Paymi munan llapallanchik mana allinkunata rurananchikta.

Runakunapa mana uyariy munasqankuta willakunanpaqmi Jehová Diosqa Enocta kamachirqa. Chaymi payqa nirqa: ‘Jehová Diosmi llapallan mana allin runakunata puchukachinqa’ nispa. Kaywanqa runakunach piñakururqaku. Hinaspa Enocta wañurachiytachá munarqaku. Chaymi Enocqa Diospa piñakuyninmanta qarinchakuspa willakunan karqa.

Chayna runakunawanqa manam unaytachu Diosqa Enocta kawsachirqa. Payqa 365 watallatam kawsarqa. ¿Imanasqataq ninchik “365 watalla”? Chay tiempopi runakunaqa kallpasapallañam karqaku hinaspa una-unay watatam kawsakurqaku. ¡Chaychiki, Enocpa churin Matusalenpas 969 watata kawsarqa!

Enocpa wañukusqan qepamanmi, runakunaqa aswantaraq mana allinta rurarqaku. Bibliaqa ninmi runakunapa ‘piensasqankupas sapa punchawmi mana allinllaña karqa’, hinaspa ‘dañanakuyllapiña kawsarqaku’ nispa.

¿Yachankichu imanasqataq chay tiempopi llumpayllataña mana allin ruraykuna yapakururqa? Satanasmi huk toqllawanña runakunata kallpancharqa mana allinta ruranankupaq. Qawasunchik imataq chayqa karqa.