DI MORO nanga moro sma ben kon na grontapu, dan moro furu fu den ben du ogri sani neleki Kain. Ma wan man ben de di ben de tra fasi. A de a man disi di ben nen Heinok. Heinok ben de wan deki-ati man. Aladi den sma, di ben de lontu en, ben e du ogri sani, toku Heinok ben tan dini Gado.

Yu sabi fu san ede den sma na a ten dati ben du someni ogri sani? We, go prakseri pikinso, suma ben meki Adam nanga Eva trangayesi Gado èn nyan fu a froktu di Gado ben taki den no musu nyan? Iya, dati ben de wan ogri engel. Bijbel e kari en Satan. Na en e pruberi fu meki ibri sma kon ogri.

Wan dei Yehovah Gado ben meki Heinok fruteri den sma wan sani di den no ben wani yere. A ben de a sani disi: ’Wan dei Gado o kiri ala ogrisma.’ Kande den sma ati ben bron srefisrefi di den ben yere disi. Kande den ben pruberi fu kiri Heinok srefi. Dati meki a ben musu abi deki-ati srefisrefi fu fruteri den sma san Gado ben o du.

Gado no ben meki Heinok libi langa na mindri den ogri sma dati. Heinok ben libi 365 yari nomo. Fu san ede wi e taki „365 yari nomo”? Bika den sma na ini a ten dati ben moro tranga leki now. Den ben e libi moro langa. A manpikin fu Heinok, Metusala, ben kon abi 969 yari!

Den sma ben kon ogri moro nanga moro, baka di Heinok dede. Bijbel e taki dati den ’ben prakseri soso ogri sani’ èn dati ’grontapu ben kon furu nanga ogridu’.

Yu sabi fu san ede someni ogri ben de na grontapu na ini den dei dati? Fu di Satan ben feni wan nyun fasi fu meki den sma du ogri sani. Wi o leri fu disi na ini san e kon now.