يەر يۈزىدە كىشىلەر كۆپىيىشكە باشلىدى. نۇرغۇن كىشىلەر قابىلغا ئوخشاش يامان ئىشلارنى قىلغىلى تۇردى. ئەمما بىر كىشى باشقىلارغا ئوخشىمايتتى. ئۇ كىشىنىڭ ئىسىمى ھانۇخ بولۇپ، ئۇ ناھايىتى جاسارەتلىك كىشى ئىدى. ئۇنىڭ ئەتراپىدىكى كىشىلەر يامان ئىشلارنى قىلىۋاتقان بولسىمۇ، لېكىن ھانۇج يەنىلا خۇداغا خىزمەت قىلىشنى داۋاملاشتۇردى.

ئۆتمۈشتە كىشىلەرنىڭ نېمە ئۈچۈن شۇنداق يامان ئىشلارنى قىلغانلىقىنى بىلەمسىز؟ ئويلاپ بېقىڭ، ئادەم-‏ئاتا بىلەن ھاۋا-‏ئانىنىڭ خۇداغا ئىتائەتسىزلىك قىلىپ، خۇدا يېمەڭلار، دېگەن مېۋىنى يېيىشىگە كىم سەۋەبچى بولغان؟ ئۇ دەل بىر يامان پەرىشتە بولۇپ، مۇقەددەس كىتاب ئۇنى، شەيتان، دەپ ئاتىغانىدى. شەيتان ھەممە كىشىنى يامان ئىش قىلىشقا ئازدۇرىدۇ.

كۈنلەرنىڭ بىرىدە، يەھۋا خۇدا ھانۇخ پەيغەمبەرنى باشقىلارغا بىر ئىشنى يەتكۈزۈشكە بۇيرۇدى، ئەمما كىشىلەر ئۇنىڭ سۆزىگە قۇلاق سالمىدى. ئۇ كىشىلەرگە:‏ «خۇدا بىر كۈنى، بارلىق يامان كىشىلەرنى يوق قىلىدۇ»، دېدى. كىشىلەر بۇ گەپنى ئاڭلىغاندا، بەلكىم بەكمۇ ئاچچىقلانغان، ھەتتا ئۇلار ھانۇخنى ئۆلتۈرۈشنى ئويلىغان بولۇشى مۇمكىن. شۇڭا، ھانۇخ جاسارەتلىك بولغاندىلا، خۇدانىڭ نېمە قىلماقچى بولغانلىقى توغرىسىدا يۈرەكلىك بىلەن باشقىلارغا ئېيتالايتتى.

خۇدا، ھانۇخ پەيغەمبەرنىڭ شۇ يامان ئادەملەرنىڭ ئارىسىدا ئۇزۇنراق ياشىشىنى خالىمىدى. ھانۇخ پەقەت 365 يىل ياشىدى. نېمە ئۈچۈن پەقەتلا «365 يىل» ياشىدى، دەيمىز؟ سەۋەبى، ئاشۇ زامانلاردا، ئادەملەر بۈگۈنكى كۈندىكى ئادەملەرگە قارىغاندا، كۆپ كۈچلۈك بولۇپ ئۇزۇن ياشايتتى. ئەمەلىيەتتە، ھانۇخنىڭ ئوغلى مەتۇشەلاھ 969 يىل ياشىغان ئىدى!

ھانۇخ پەيغەمبەر ئۆلگەندىن كېيىن، كىشىلەر تېخىمۇ كۆپ يامان ئىشلارنى قىلدى. مۇقەددەس كىتاب:‏ «ئىنسانلارنىڭ رەزىللىكىنى، نىيىتىنىڭ ھەرقاچان يامانلىقىنى،… يەر يۈزىنىڭ زوراۋانلىققا تولغانلىقىنى»، بايان قىلىدۇ.

ئاشۇ زامانلاردا، يەر يۈزىنىڭ نېمە ئۈچۈن شۇنچە كۆپ يامان ئىشلارغا تولغانلىقىنى بىلەمسىز؟ سەۋەبى، شەيتان يېڭى بىر ئۇسۇل بىلەن كىشىلەرنى يامان ئىشلارنى قىلىشقا قۇتراتقانىدى. كېيىنكى پارچە ھېكايىدە، شۇ توغرىسىدا ئۆگىنىمىز.

يارىتىلىش 5:‏21-‏24، 27؛ 6:‏5؛ ئىبرانىيلار 11:‏5؛ يەھۇدا 14، 15