SAMTANG nagtitikadamu an mga tawo ha tuna, kadam-an ha ira an nagbubuhat hin maraot pariho kan Kain. Kondi may-ada usa nga naiiba. Hiya hi Enok. Maisog hiya nga tawo. An mga tawo ha iya palibot maraot gud an ginbubuhat, kondi padayon pa gihapon hiya nga nag-aalagad ha Dios.

Maaram ka ba kon kay ano nga magraot an mga tawo hadto? Aw, hunahunaa, Hin-o an nag-aghat kanda Adan ngan Eva nga diri sundon an Dios, ngan kumaon han bunga nga igindidiri Niya? Oo, an maraot nga anghel. Gintatawag hiya ha Biblia nga Satanas. Ngan karuyag niya nga magin maraot an ngatanan.

Usa ka adlaw, ginsugo ni Jehova nga Dios hi Enok nga igsumat ha mga tawo an mensahe nga diri nira karuyag hibatian. Ini an mensahe: ‘Maabot an panahon nga bubungkagon han Dios an ngatanan nga magraot.’ Posible nga nasina gud an mga tawo han hinbatian nira ini. Bangin nangalimbasog pa ngani hira ha pag-iparatay kan Enok. Salit kinahanglan magin maisog gud hi Enok basi sumatan an mga tawo han pagbubuhaton han Dios.

Waray tuguti han Dios nga mabuhi hin maiha hi Enok upod han magraot nga tawo. Nabuhi hi Enok hin 365 ka tuig la. Kay ano nga nakasiring kita nga “365 ka tuig la”? Tungod kay an mga tawo hadto mas magkusog ngan mas higlawig an kinabuhi kay ha mga tawo yana. Oo, an anak ni Enok nga hi Matusalem nabuhi hin 969 ka tuig!

Han namatay hi Enok, an mga tawo mas nagtikaraot pa gud. An Biblia nasiring nga ‘an ngatanan nga ira ginhuhunahuna pirme la maraot,’ ngan an ‘tuna napuno hin karaotan.’

Maaram ka ba han usa han mga hinungdan kon kay ano nga puno hin karaotan an tuna hito nga panahon? Tungod ito kay hi Satanas may-ada bag-o nga paagi ha pag-aghat ha mga tawo basi magbuhat hira hin karaotan. Mahibabaroan naton an mahitungod hini ha masunod nga istorya.