ŴANDU ŵatandite kutupa pacilambo, ŵajinji ŵatendaga yakusakala mpela Kaini. Nambo mundu jumo jwaliji jwambone. Mundu jwakwe ali jwali pelepaju, Enoki. Enoki ŵaliji mundu jwakulimba mtima. Ŵandu wosope ŵajwatamaga nawo ŵatendaga yindu yakusakala mnope, nambo Enoki ŵajendelecele kumtumicila Mlungu.

Ana akumanyilila ligongo lyakwe ŵandu ŵakalaŵa ŵatendaga yakusakala mnope? Aganicisye kaje ayi, Ana nduni juŵatendekasisye kuti Adamu ni Hawa akapikanila Mlungu ni kulya cisogosi ciŵasalile Mlungu kuti akalya? Lyaliji lilayika lyakusakala. Baibulo jikusalikolanga lilayikali kuŵa Satana. Jwalakwe akulingalinga kumtendekasya mundu jwalijose kuŵa jwakusakala.

Lisiku line Yehofa Mlungu ŵamsalile Enoki kuti ŵasalile ŵandu yindu yanganasaka kuyipikana. Yindu yakwe yaliji yakuti: ‘Mlungu lisiku line cacajonanga ŵandu wosope ŵakusakala.’ Mwangakayicila ŵandu ŵatumbile mnope ­paŵapikene yeleyi. Jemanjajo mpaka ŵasakaga ­kum’wulaga Enoki. Enoki ŵasosekwe kulimba mtima mnope kuti ŵasalile ŵandu yindu yaŵasakaga Mlungu kuyitenda.

Mlungu nganakunda kuti Enoki atame kwandaŵi jelewu ni ŵandu ŵakusakalawo. Enoki ŵagambile kutama yaka 365 basi. Ana ligongo cici tukuti “yaka 365 basi”? Ligongo lyakuti ndaŵi jelejo ŵandu ŵakwete macili mnope kulekangana ni ndaŵi jetu jino, ni ligongo lyakwe ŵatamaga ndaŵi jelewu. Mwambone, mwanace jwa Enoki, Metusela jwatemi ni yaka 969!

Paŵagambile kuwa Enoki, ŵandu ŵajendelecele kusakala mnope. Baibulo jikutusalila kuti ‘nganisyo syawo syosope syaliji syakusakala ndaŵi syosope,’ m’yoyo ‘cilambo cagumbele ni kuwulasyana.’

Ana akumanyilila ligongo line lyalyatendekasisye kuti kuŵe yakusawusya yejinji moŵa gelego? Lili ligongo lyakuti Satana ŵalingaga litala lyasambano lyakwatendekacisya ŵandu kutenda yakusakala. Citulijiganye yeleyi mu ngani jakuyicisya.