LE KA káaj u yaʼabtal máak yóokʼol le Luʼumaʼ, óoliʼ tuláakloʼob tu beetoʼob baʼaloʼob kʼaastak jeʼex Caineʼ. Baʼaleʼ, utúul máak u kʼaabaʼ Enoqueʼ maʼ bey tu beetiʼ. Letiʼeʼ maʼ tu chʼaʼaj saajkiliʼ. Kex kajaʼan kaʼach ichil máakoʼob kʼasaʼantakeʼ, letiʼeʼ maʼ tu pʼataj u meyajtik Diosiʼ.

¿A wojel wa baʼaxten ku sen beetkoʼob kaʼach baʼaloʼob kʼaastak le máakoʼoboʼ? Tukult lelaʼ: ¿Máax beet maʼ u yuʼubkoʼob u tʼaan Dios Adán yéetel Eva, bey xan ka u jaantoʼob u yich le cheʼ aʼalaʼantiʼob maʼ u jaantkoʼobeʼ? Utúul kʼasaʼan ángel. Le Bibliaoʼ kiaʼalikeʼ u kʼaabaʼ le ángelaʼ Satanás. Letiʼeʼ u kʼáat u láaj sutoʼon kʼasaʼanil.

Upʼéel u kʼiinileʼ Jéeoba Dioseʼ tiaʼalaj tiʼ Enoc ka u tsʼáaj u yojéelt le máakoʼob upʼéel baʼal maʼ u kʼáat u yuʼuboʼob kaʼachoʼ. Enoqueʼ tiaʼalaj: Yaan u kʼuchul u kʼiinil u xuʼulsaʼal tiʼe kʼasaʼan máakoʼob tumen Diosoʼ. Lelaʼ tu beetaj wal u jach kʼuuxil le máakoʼoboʼ. Maʼ xaaneʼ taakchaj u kíimskoʼob Enoc. Le oʼolal kʼaʼabéetchaj maʼ u chʼaʼik saajkil utiaʼal u yaʼalik tiʼe máakoʼob baʼax ken u beet Diosoʼ.

Dioseʼ maʼ tu chaʼaj u kuxtal Enoc yaʼab kʼiinoʼob ichil le kʼasaʼan máakoʼoboʼ. Chéen kuxlaj 365 jaʼaboʼob. ¿Baʼaxten k-aʼalik chéen 365? Tumen teʼ kʼiinoʼob jeʼeloʼ le máakoʼoboʼ maas tʼaʼajtakoʼob tiʼ le máakoʼob bejlaʼa, le oʼolal maas yaʼab jaʼaboʼob ku kuxtaloʼob kaʼachi. ¡Beyoʼ! ¡Matusalén, u paal Enoqueʼ, kuxlaj 969 jaʼaboʼob!

Ka tsʼoʼok u kíimil Enoqueʼ, le máakoʼoboʼ maas kʼaschajoʼob. Le Bibliaoʼ kiaʼalikeʼ tuláakal baʼax ku tuklikoʼob kaʼacheʼ láaj kʼaas, bey túunoʼ, teʼ Luʼumoʼ chéen sen loob ku beetaʼaliʼ.

¿A wojel wa baʼax oʼolal sen yanchaj yaʼab talmiloʼob teʼ kʼiinoʼob jeʼeloʼ? Tumen Satanaseʼ tu kaxtaj uláakʼ bix jeʼel u bisik máak u beet baʼax kʼaaseʼ. Koʼox ilik baʼaxiʼ.