UTAMARU wali jachʼa jaqix jutaspa, utams jilakipaspa, ¿kamsasmasa? ¡Wali jachʼa jaqirakisä! sasmawa. Mä tiempoxa ukham jaqinakaw aka Uraqin utjäna. Uka jaqinakax alaxpachan jakasir angelanakan wawanakapäpxänwa siw Bibliaxa. ¿Ukax kunjamäpachänsa?

Amtañäni, Supay ñanqha angelaw jan walinak utjayaskäna. Diosan angelanakaparusa ñanqhaptayañwa munäna. Ukat tiempompixa, yaqhip angelanakax Supayaruw istʼxapxäna. Alaxpachan Diosatak lurasipkän uk jaytasawa aka Uraqiru saraqanipxatayna, ukat cuerponak lurasipxatayna. ¿Kunatsa jutapxatayna uk yattati?

Kunattix suma uñtani warminakaruw uñchʼukinipxatayna, ukat jupanakampiw jakañ munapxäna siw Bibliaxa. Ukatwa alaxpachat saraqanisax jupanakamp chikachasipxatayna. Ukax janiw walïkänti siw Bibliaxa, kunattix angelanakaxa alaxpachan jakasipxañapatak luratäpxänwa.

Kunapachatï uka angelanakax warminakapampi wawanakanïxapxäna ukhaxa, mayja wawanakanïpxänwa. Inas wawäkasinxa jan mayjapkchïnti. Ukampisa, jilsusipkakïnwa jachʼaptasipkakïnwa chʼamaniptasipkakïnwa, ukatxa, jachʼa jaqinakaruw tukupxäna.

Uka jachʼa jaqinakax wali qhurunakäpxänwa. Ukham jachʼäsinsa chʼamanïsinsa, jaqinakaruw tʼaqhisiyapxäna. Munkir jan munkir jaqinakarux jan walinak lurayañ munapxäna.

Enoc chachax jiwatäxanwa, ukampisa aka Uraqinxa mä suma jaqiw utjarakïna. Uka chachax Noé satänwa. Diosan munañaparupuniw kunsa luräna.

‘Tiempox purinxiw jan wali jaqinakar chhaqtayañatakix’ sasaw Noé tatarux mä urux Diosax säna. Ukampis Diosax Noempiru familiapampiru ukat animalanakampiru qhispiyañapänwa. Kunjamsa qhispiyatayna uk uñjañäni.