NGA ca kuti wamona umuntu umutali sana ica kuti alefika na mu mutenge wa ng’anda aleisa uko uli, kuti watila muntu wa musango nshi? Kuti watila uyo muntu lipaka! Inshita imo pano calo pali amapaka. Baibolo itila bawishi ba aya mapaka baali ni bamalaika abafumine ku muulu. Cali shani pa kuti bamalaika bakwate abana?

Ibukisha ukuti, malaika wabipa Satana alebombesha ukuleta icimfulunganya. Alefwaya no kuti bamalaika ba kwa Lesa balecita ifyabipa. Awe bamalaika bamo basukile batendeka ukumfwila Satana. Balekele no kubomba umulimo Lesa abapeele mu muulu. Kabili baishile pano calo no kuisangula abantu. Bushe nawishiba ico bacitiile ifi?

Baibolo itila icalengele aba abana ba kwa Lesa ukucita ifi, ni co bamwene abanakashi abasuma sana kabili balefwaisha ukulaikala nabo. Awe baishile pe sonde no kuupa aba banakashi. Baibolo itila ico bacitile tacaweme, pantu Lesa apangile bamalaika ukuti baleikala ku muulu.

Abana abo bamalaika na bakashi babo bakwete, tabaali nga ifwe. Napamo ilyo bafyelwe fye tabapusene sana na ifwe. Lelo batwalilile fye ukukula no kukwatilako amaka, basuka baba amapaka.

Aya mapaka yalibipile icine cine. Yalepuma abantu no kubapatikisha ukucita ifyabipa ifyo yalecita pantu yali ayakulu kabili aya maka.

Enoke alifwile, lelo kwaishileba umuntu na umbi pe sonde uwali umusuma. Uyu muntu ni Noa. Lyonse alecita ifyo Lesa alefwaya.

Bushiku bumo Lesa aebele Noa ukuti inshita naifika iya kuti onaule abantu babipa bonse. Lelo Lesa ali no kupususha Noa no lupwa lwakwe e lyo ne nama ishingi. Natumone ifyo Lesa acitile pa kupususha abantu ne nama.