NYI UMWE mutu kali musuku chinji ngwe ha matetela a fulumba lia zuwo lie, nyi maheta kuli yena, kuchi yena munyonga? Mutu wacho mahasa kupwa chindululu! Ku mashimbu a kunyima chamwenemwene hashi te hapwile yindululu. Mbimbiliya yinasolola ngwo atato te angelo waze ejile mu malilu. Mba kuchi chino chinakapwa?

Euluka ngwo, umwe mungelo mupi mwe Satana te kakuneha milonga yinji. Iye yafupa nawa kupiangula angelo ja Zambi hanga noo apwe api. Ha mashimbu jacho, amwe akuli ayo yaputuka kupanjika Satana. Ayo yecha mulimo uze Zambi anakaha mu malilu. Yeza hano hashi nawa yalialumuna yapwa ni mijimba ya musunya. Yena unanyingika mumu liaka?

Mbimbiliya yinambe ngwo ana ja Zambi yamona hano hashi ana-mapwo kali apema chinji nawa yazanga kutwama no. Kashika ayo yeza hano hashi hanga alimbate no. Mbimbiliya yinambe ngwo chino te chipi chinji, mumu Zambi kanakalinga angelo hanga atwame mu malilu.

Muze angelo ni mapwo jo asemene ana, ana jacho te kalisa ni akwo. Ha uputukilo kulisa chacho kota te chishi kusoloka chinji. Alioze ana jacho yaputuka kupwa anene-anene, nawa ni tachi jinji, ndo ni muze jinakapwa yindululu.

Yindululu wano kapwile api chinji. Amu ayo apwile anene-anene nawa ni tachi jinji, te kakulamba akwo. Ayo te kakushinjila atu eswe hanga apwe ni yitanga yipi ngwe ya ayo.

Enoke te wafwile kulu, alioze kwapile umwe lunga mupema hano hashi. Jina lienyi te Noa. Iye mashimbu eswe te kakulinga yize Zambi akuzanga.

Limwe tangwa Zambi yamba kuli Noa ngwo, hi kwaheta mashimbu hanga Iye anongese atu eswe api. Mba alioze Zambi te malamwina Noa, ni asoko jenyi nawa ni tushitu anji. Tutalenu chize Zambi anakalinga yuma yacho.