MI PAKHAT nan sin i a ra lengmang mi cu nan inn kaan tluk in a tung sang seh law zeitindah nan ruah hnga? Amah cu mikei a si ko lai! Vawlei cung ah hin hlan lio ah mikei cu an rak um taktak. Baibal nih cu hna an pale cu vancung i vancungmi an rak si a ti. Asinain mah cu zeitindah a rak si khawh?

A ṭha lo mi vancungmi Seitan cu minung harnak pek awk ah a rian a tam zungzal ti cu philh hlah u. Vancungmi hna hmanh kha ṭhat lo ter ve awk ah aa rak i zuam. A hnu ah cun hi vancungmi cheukhat cu Seitan a bia kha an rak ngaih. Vancung i Pathian nih ṭuan awk ah a pek mi hna rian kha an rak ngol. Cun vawlei cung ah an rung ṭum i minung pum kha an rak i lak. Zeicah cutin an tuah ti nan hngal maw?

Vawlei cung i aa dawh mi minung fanu hna kha khi vancungmi Pathian fapa hna nih an hmuh hna i aa dawh mi nu hna he cun um ṭi an duh caah a si tiah Baibal nih cun a chim. Cucaah vawlei ah an rung ṭum i cu nu hna cu nupi ah an ṭhit hna. Baibal nih cu ti an tuah mi cu a hmaan lo tiah a ti, zeicahtiah Pathian nih vancungmi cu vancung ah um ding in a ser mi hna an si.

Cu vancungmi hna le an nupile nih fa an hun ngeih tik ah, an fale cu an rak i phun dang. A hmasa ah cun aa dang tuk mi an lo lai lo. Sihmanhsehlaw a hnu ah cun mikei an si hlan tiang an ngan chin lengmang i an ṭhawng chin lengmang.

Hi mikei hna cu an rak ṭha lo. Annih cu an pum a ngan i an tha a rak ṭhawn caah minung kha an rak hrem hna i harnak an rak pek hna. Mikip zong kha anmah bantuk in ṭhat lo ve awk ah an rak forh hna.

Enok tu cu a rak thi cang, sihmanhsehlaw vawlei cung ah mi ṭha pakhat a rak chuak ṭhan. Cu mipa a min cu Noah a rak si i, amah cu Pathian nih tuah seh ti a duh mi lawngte kha a rak tuah zungzal.

Nikhat cu Pathian nih Noah kha mi ṭhalo vialte cu ka hrawh nak hna ding caan a tling cang tiah a rak chimh. Sihmanhsehlaw Noah, a innchungkhar le saram tampi cu Pathian nih ka khamh hna lai a rak ti. Pathian nih mah cu zeitindah a rak tuah zoh hmanh u sih.