SI OU vwar en dimoun pe marse pour vin kot ou, i gran i kapab tous plafon ou lakaz, ki ou ti pou mazinen? Sa dimoun i en zean! Pandan en letan ti annan zean lo later. Labib i montre ki zot papa ti bann lanz. Me konman ki sa ti posib?

Mazinen, sa move lanz Satan ti touzour pe kree problenm. I ti menm esey fer bann lanz Bondye vin move. Avek letan, serten sa bann lanz ti konmans ekout Satan. Zot ti aret sa travay ki Bondye ti’n donn zot dan lesyel. Zot ti vin lo later, e zot ti sanz zot dan bann lekor imen. Eski ou konnen akoz?

Labib i dir ki bann garson Bondye ti vwar bann zoli fiy lo later e zot ti anvi viv avek zot. Alor zot ti vin lo later e marye avek sa bann fiy. Labib i dir ki sa ti mal, akoz Bondye ti’n kree bann lanz pour viv dan lesyel.

Kan sa bann lanz ek zot madanm ti ganny bann pti baba, sa bann pti baba ti diferan. Okonmansman, zot pa ti paret tro diferan avek lezot pti baba. Me anmezir ki zot ti grandi zot ti vin gro e for, ziska ki zot ti vin bann zean.

Sa bann zean ti move. E akoz zot ti gro e for, zot ti fer ditor bann dimoun. Zot ti esey fors tou dimoun pour vin move parey zot.

Enok ti’n mor, me aprezan ti annan en zonm lo later ki ti fer sa ki byen. I ti apel Noe. I ti toultan fer sa ki Bondye ti oule i fer.

En zour Bondye ti dir Noe ki letan in arive pour Li detrir tou bann move dimoun. Me Bondye ti pou sov Noe, son fanmiy ek en kantite zannimo. Annou vwar konman Bondye ti fer sa.