KE TOROVI iko tiko mai e dua e yacova na doka ni nomu vale na kena balavu, o na rairai kaya ni o koya na tuwawa. Era a tu dina e vuravura na tuwawa ena dua na gauna, qai kaya kina na iVolatabu ni tamadra na agilosi mai lomalagi. E rawa vakacava ni yaco na ka oqo?

Nanuma tiko ni a vakaogai koya ena vakavu ca na agilosi o Setani, qai sagai ira sara mada ga na agilosi ni Kalou mera caka ca. Yaco na gauna me so era rogoci koya. Era biuta na nodra ilesilesi vakalou mai lomalagi, ra vukici ira mera yago vakatamata ra qai lako sobu mai vuravura. O kila na vuna?

E kaya na iVolatabu ni gauna era raici ira kina na yalewa totoka ni vuravura o ira na luve ni Kalou oqo, era vinakata sara ga mera mai bula vata kei ira. Sa ra qai lako mai vuravura mera vakawatitaki ira na yalewa oqo. Na iVolatabu e kaya ni cala na ka era cakava, ni a buli ira na Kalou mera bula ga mai lomalagi.

Ena gauna gona era sa mai vakaluveni kina, e duatani na irairai ni luvedra. A sega soti ni laurai na kedra duidui nira se qai sucu. Ia, ni toso na gauna e laurai levu nira tubu tiko ga mera lelevu, momoqaqa, yacova sara nira sa lai tuwawa.

Era ca na tuwawa oqo, nira dau vakayagataka nodra kaukaua levu mera veivakamavoataki. E dau nodra sasaga mera vakatubuca mera lai ca tale ga kina na lewenivanua.

Sa mai mate o Inoki, ia e dua tale na turaga vinaka a bula tiko e vuravura, na yacana o Noa. A dau cakava na ka e vinakata na Kalou.

Ena dua na siga a kaya na Kalou vei Noa ni sa kena gauna me na vakarusai ira kece kina na tamata ca. Ia ena vakabulai ga o Noa, nona vuvale, kei na vuqa na manumanu. Meda raica mada se a cakava vakacava oqo na Kalou.