SÜNTALEERE nikii wanee wayuu sutuʼupaʼamüin pipia, ¿jameerü pünüiki? ¡Nia wanee wayuu miyoʼushaata! Eepuʼushii namaiwa wayuukana naainnua. Saashin tü Wiwüliakat nachonnii naya na aapieekana. ¿Jamüsü sülataka tia?

Soto paaʼin Satanás chi aapiee mojulaashikai numojujuin nakuwaʼipa na wayuukana otta mojulaweeshii nutuma na aapiee anamiakana. Mapa oonooshii napüshi na aapieekana sümüin nünüiki, nooʼulaaka tü naʼyataainkat chaaʼaya iipünaa süpüla wayuuyaain naya Mmapaʼamüin. ¿Pütüjaa aaʼu jamüsü naainjaka tia?

Saashin tü Wiwüliakat shia süka neʼrüin tü jieyuu anasüchenkat saaʼu tü Mmakat, nantaka süpüla naʼwayuusein naya. Mojusü maʼin tia saashin tü Wiwüliakat süka nukumajüin Maleiwa na aapieekana süpüla chainjanain naya sirumatuʼu.

Kachonniipa naya sümüin naʼwayuuse, naatajannuu maʼin nachonnii, miyoʼuyuushaata otta katchinshii maʼin naya.

Wayuukana naainnua mojulaashii maʼin, süka miyoʼuyuuin naya müliashii maʼin na wayuukana natuma otta naainjirüin kasa mojusü.

Süchikijee ouktuin Enoc eeshi wanee wayuu anamia. Noé nünülia, naainjüin waneepia tü keeʼireekat naaʼin Maleiwa.

Soʼu wanee kaʼi nüküjüin Maleiwa nümüin Noé najaʼttirajanain na wayuu mojulaashiikana, akaisaʼa Noé katüinjatü noʼu sümaa nüpüshi otta wainma mürüt. Wekirajaa sünain jamüin sukuwaʼipa nutuma.