Zzman ideg i llan leɣwal
TAQSIṬ TIS 8
Zzman ideg i llan leɣwal
ACU ara d-tiniḍ lukan aţ-ţwaliḍ yiwen wergaz yesɛan lqedd ameqran a d-ileḥḥu ɣur-ek, yerna aqerru-s yewweḍ ɣer ssqef n wexxam-ik? Ahat argaz-agi d lɣul! D ṣṣeḥ, yella yiwen n zzman anda llan leɣwal ɣef lqaɛa. Adlis Iqedsen inna-d belli ibabaten-nsen d lmalayek yeţɛicin deg igenni. Amek armi i d-yeḍra wannect-a?
Tecfiḍ ɣef Cciṭan, lmelk-nni n diri i gxeddmen siwa cceṛ? Yeɛreḍ ad issefsed ula d lmalayekkat n Ṛebbi. Cwiṭ cwiṭ, llant kra gar-asent i t-itebɛen. Lmalayekkat-agi ǧǧant ccɣel i sent-yefka Ṛebbi deg igenni yerna ṣubbent-ed ɣer lqaɛa, anda lsant lǧeţţa icuban tin n yemdanen. Teẓriḍ acuɣer?
Adlis Iqedsen yefka-d ssebba. Arraw-agi n Ṛebbi yellan d lmalayek walan belli tilawin ɣef lqaɛa cebḥent, dɣa bɣan ad ɛicen yid-sent. Ihi ṣubben-d ɣer lqaɛa akken ad zewǧen yid-sent. Adlis Iqedsen yenna-d belli diri wayen i xedmen axaṭer Ṛebbi ixleq-iten-id akken ad ɛicen deg igenni.
Mi zewǧen nutni ţ-ţlawin-agi, sɛan-d dderya ixulfen dderya nniḍen. Di tazwara, izmer lḥal ur d-banen ara warraw-nsen mxalafen mliḥ ɣef wiyaḍ. Lameɛna, skud iţɛedday lweqt, ama d lqedd-nsen ama d lǧehd-nsen ţnernin rennun armi uɣalen d leɣwal.
Leɣwal-agi d imcumen. Imi meqqrit yerna ǧehden aṭas, qehren imdanen. Ɛerḍen ad ssefsden medden meṛṛa akken ad uɣalen am nutni.
Ḥanux yemmut, lameɛna yella yiwen wergaz nniḍen yelhan ɣef lqaɛa di lawan-nni. Isem n wergaz-agi d Nuḥ. Nuḥ yeţţaɣ dima awal i Ṛebbi.
Yiwen wass, Yahwa yenna i Nuḥ belli yewweḍ-ed lweqt ad issenger akk imcumen. Lameɛna Yahwa ad isellek Nuḥ ţ-ţwacult-is d waṭas n lḥiwan. A nwali tura amek yexdem Ṛebbi annect-a.
