ŨKONA mũndũ okĩte na kũla ũĩ, mũasa kũvika ta kĩango kya nyũmba yenyu, we ũsũanĩa ata? Ũsu ethĩwa e mũndũ mũnene ta kĩ! Ĩvinda yĩmwe kwaĩ na mamũndũ manene kũũ nthĩ. Mbivilia yonanasya kana aaĩthe moo maĩ alaĩka kuma ĩtunĩ. Ĩndĩ ũu watonyekie ata?

Lilikana kana mũlaĩka mũthũku Satani nowaendee na kũete kĩthokoo. O na nĩwatatie kũtuma alaĩka ma Ngai methĩwe me athũku. Ĩtina wa ĩvinda ĩna, amwe ma alaĩka asu nĩmambĩĩie kũmwĩthukĩĩsya Satani. Nĩmaekie wĩa woo ũla manengetwe nĩ Ngai ĩtunĩ. Na nĩmatheeie kũũ nthĩ na meeseũvĩsya mĩĩ ta ya andũ. We nĩwĩsĩ nĩkĩ?

Mbivilia yaasya kĩtumi nũndũ ana asu ma Ngai moonie aka ala ombe nesa kũũ nthĩ na mendaa kwĩkalany’a namo. Kwoou nĩmookie kũũ nthĩ na mamatwaa. Mbivilia yaasya ũu meekie waĩ ĩvĩtyo, nũndũ Ngai oombie alaĩka mekalae ĩtunĩ.

Yĩla alaĩka na iveti syoo meethĩiwe na syana, syana isu syaĩ kĩvathũkany’o na ila ingĩ. Syĩ nini iyoonekaa syĩ kĩvathũkany’o mũno. Ĩndĩ nĩsyaendeeie na kwĩana na kwĩthĩwa na vinya mwingĩ kũvika syatw’ĩka mamũndũ manene mũno.

Mamũndũ asu maĩ athũku. Na nũndũ maĩ anene mũno na maĩ na vinya mwingĩ, nĩmaũmĩasya andũ. Nĩmatatie kũtũmĩa vinya nĩ kana kĩla mũndũ ethĩwe e mũthũku o tamo.

Enoko aĩ anakw’a, ĩndĩ ĩvindanĩ yĩu kwaĩ na mũndũ ũmwe mũseo kũũ nthĩ. Mũndũ ũsu eetawa Noa. Ĩvinda yonthe ekaa ũndũ Ngai wendaa eke.

Mũthenya ũmwe Ngai nĩweeie Noa kana ĩvinda Yake nĩ ĩviku ya kwananga andũ onthe ala athũku. Ĩndĩ Ngai aĩ atangĩĩe Noa vamwe na andũ ma mũsyĩ wake, na mĩthemba mingĩ ya nyamũ. Ekai twone ũndũ Ngai weekie ũu.

Mwambĩlĩlyo 6:1-8; Yuta 6.