WI TAAWIL raj junaq winq jwal nim roq, chanchan xteram jun li ochoch. Kʼaru raj taakʼoxla? Tatxuwaq, peʼyaal? Najter keʼwank winq jwal nimebʼ roq saʼ Ruuchichʼochʼ. Li Santil Hu naxye naq musiqʼej li xyuwaʼebʼ li winq aʼin. Chanru kikʼulmank aʼin?

Chaajultika naq laj Tza yook chaq chi kʼehok chʼaʼajkilal. Laj Tza kixbʼaanu naq ebʼ li anjel teʼmaaʼusoʼq. Wankebʼ li anjel keʼxpaabʼ re laj Tza. Keʼxkanabʼ chaq xkʼanjel saʼ choxa. Naq keʼkʼulunk ebʼ li anjel aʼin saʼ Ruuchichʼochʼ keʼtibʼeloʼk. Ma nakaanaw kʼaʼut?

Li Santil Hu naxye naq ebʼ li anjel aʼin, keʼril naq ebʼ li ixq chʼinaʼus nekeʼilok ut keʼraj wank rikʼinebʼ. Joʼkan naq, keʼchalk saʼ Ruuchichʼochʼ ut keʼsumlaak rikʼinebʼ. Moko us ta li keʼxbʼaanu ebʼ li anjel aʼin, xbʼaan naq li Yos kixyoobʼtesihebʼ re naq teʼwanq saʼ choxa.

Naq keʼyoʼlaak ebʼ li ralal xkʼajol ebʼ li anjel aʼin, moko keʼkʼutunk ta naq jalanebʼ chiqu. Abʼan, keʼok chi kʼiik ut keʼok chi numtaak xmetzʼew toj reetal naq keʼnimank roq.

Ebʼ li winq aʼin, jwal nimebʼ roq ut maaʼusebʼ xnaʼlebʼ. Kʼajoʼ keʼxrahobʼtesi ebʼ li poyanam xbʼaan naq jwal nimebʼ ut kawebʼ ribʼ. Keʼxyal xminbʼal ruhebʼ li poyanam re naq teʼmaaʼusoʼq xnaʼlebʼ ajwiʼ.

Naq ak kikamk chik laj Enoc, kiwank jun chik winq chaabʼil xchʼool, aj Noe xkʼabʼaʼ. Li winq aʼin junelik kixbʼaanu li us.

Saʼ jun kutan li Yos kixye re laj Noe naq xwulak xqʼehil naq tixsachebʼ li maaʼusebʼ xnaʼlebʼ. Abʼan tixkol laj Noe ut li xjunkabʼal. Joʼkan ajwiʼ tixkol naabʼal li xul. Qilaq chanru kixbʼaanu aʼin.