KANA nge mona muntu ya nda kekwisa na nge, yina ntu na yandi kezola kukuma na plafond ya nzo na nge, inki nge tayindula? Yandi fwete vanda kafumba ya muntu! Na ntangu ya ntama, bakafumba ya bantu vandaka awa na ntoto. Batata na bau kuvandaka bawanzyo. Yau kusalamaka nki mutindu?

Satana, wanzyo ya mbi, vandaka kusosa konso ntangu na kutula mavwanga awa na ntoto. Yandi mekaka nkutu na kupusa bawanzyo ya Nzambi na kusala mambu ya mbi. Na kati na bau bankaka kuwilaka yandi. Bau bikaka kisalu yina Nzambi kupesaka bau mpi bau kukulumukaka awa na ntoto mpi bau bakaka nitu ya bantu. Beno zaba sambu na inki?

Bible ketuba nde sambu bawanzyo yina kumonaka nde bana ya bankento yina vandaka awa na ntoto vandaka kitoko mingi, yau yina bau waka nzala ya kukwela bau. Yau yina bau kulumukaka sambu na kukwela bau. Yau vandaka mambu ya mbi kibeni, sambu Nzambi gangaka bawanzyo sambu bau kuzinga na zulu.

Na makwela yina, bana ya mutindu yankaka kubutukaka. Na lubutuku na bau, bau vandaka bonso bantu yonso, kansi na nima ya mwa bilumbu, bau kumaka mutindu yankaka. Na kuyela na bau, bau kumaka bakafumba ya bantu.

Bakafumba ya bantu yina vandaka bantu ya mbi kibeni. Ti ngolo na bau yina, bau vandaka kubula bantu. Bau vandaka kupusa bantu yonso na kukuma mbi bonso bau mosi.

Henok fwaka, kansi ntoto vandaka dyaka na muntu mosi ya mbote. Zina na yandi Noé. Noé vandaka kaka kulemfukila Nzambi.

Kilumbu mosi Nzambi tubaka na Noé nde yandi tafwa bantu yonso ya mbi, kansi yandi tagulusa Noé, na dibuta na yandi mpi bambisi mingi. Beto tala mutindu Nzambi kulungisaka lukanu na yandi.