ŨNGĨCEMANIA na mũndũ mũraihu mũno ta mũtheca itu-rĩ, ũngĩciiria atĩa? Hĩ! Mũndũ ũcio no akorirũo arĩ irimũ. Kũna-rĩ, hĩndĩ ĩmwe nĩ kwarĩ na marimũ gũkũ thĩ. Biblia ĩtuonagia atĩ maithe mao maarĩ araika kuuma igũrũ matu-inĩ. Kwahotekire atĩa?

Ririkana, mũraika ũrĩa mũũru Shaitani aarĩ na mĩhang’o mũno ya gũthũkia. O na nĩaageragia kũgucĩrĩria araika a Ngai matuĩke oru take. Ihinda rĩa hĩtũka-rĩ, amwe a araika acio makĩambĩrĩria gũthikĩrĩria Shaitani. Magĩtiganĩria wĩra ũrĩa maaheetwo nĩ Ngai kũu igũrũ. Maikũrũkire gũkũ thĩ na makĩĩhumba mĩĩrĩ ya andũ. Nĩ ũũĩ gĩtũmi nĩ kĩĩ?

Biblia ĩtwĩraga gĩtũmi nĩ atĩ ciana icio cia Ngai cionire airĩtu athaka gũkũ thĩ na ikĩenda gũtũũrania nao. Kwoguo-rĩ, magĩikũrũka gũkũ thĩ na makĩhikia atumia acio. Biblia ĩtwĩraga atĩ ũũ waarĩ mahĩtia, tondũ Ngai ombĩte araika matũũrage igũrũ matu-inĩ.

Hĩndĩ ĩrĩa araika acio na atumia ao maagĩire ciana-rĩ, ciana icio ciarĩ na ngũũrani. Mbere irĩ nyinyi-rĩ, itionekaga irĩ na ngũũrani na iria ingĩ o na hanini. No rĩrĩ, ciathiire na mbere igĩkũraga o gũkũra, na kũgĩa na hinya mũno makĩria, o nginya igĩgĩtuĩka marimũ.

Marimũ maya maarĩ moru. Na tondũ maarĩ manene mũno na ningĩ makagĩa hinya-rĩ, nĩmatuuragia andũ aingĩ. Maageragia gũtũma andũ othe matuĩke oru ta o na hinya.

Enoku nĩ aakuĩte, no nĩ kwarĩ mũndũ ũmwe tu waarĩ mwega thĩinĩ wa thĩ. Rĩĩtwa rĩa mũndũ ũyũ rĩarĩ Nuhu. Eekaga o ũrĩa Ngai eendaga eeke.

Mũthenya ũmwe Ngai nĩerire Nuhu atĩ kahinda nĩ gakinyu ga kwananga andũ othe oru. No ĩndĩ Ngai nĩ angĩahonokirie Nuhu, famĩlĩ yake na nyamũ nyingĩ. Reke tuone ũrĩa Ngai eekire ũguo.