ပူ ၈
ဒိးတကါဖးဒိၣ်တဖၣ်လၢဟီၣ်ခိၣ်ချၢ အဂ့ၢ်
ပှၤတဂၤဟဲပိာ်ကျဲ ဆူသုအိၣ်ဒီး အဂီၤတခီမ့ၢ်ထီတုၤလၢ သုဟံၣ်ခိၣ်တဒၢမဲာ်သၢပျၢၤ သုကဆိကမိၣ်ဒ်လဲၣ်. အဝဲကမ့ၢ်ဒၣ်ဒိးတကါလီၤသၢၣ်. ဘၣ်တဘျီန့ၣ် လၢဟီၣ်ခိၣ်ချၢအံၤ ဒိးတကါဖးဒိၣ်တဖၣ် အိၣ်တ့ၢ်ဝဲဒၣ် သပှၢ်ကတၢၢ်န့ၣ်လီၤ. လံာ်စီဆှံပာ်ဖျါလၢ အဝဲသ့ၣ်အပၢ်န့ၣ် မ့ၢ်မူခိၣ်ကလူးတဖၣ်န့ၣ်လီၤ. ဘၣ်ဆၣ်သနာ်က့ တၢ်န့ၣ်ကဲထီၣ်ကသ့ဒ်လဲၣ်.
သ့ၣ်နီၢ်တၢ်လၢ မူခိၣ်ကလူးအအၢဖးဒိၣ်စၤတၣ်န့ၣ် အတၢ်မၤအါထီဘိလၢ ကမၤနးမၤဖှီၣ်ပှၤကညီန့ၣ်တက့ၢ်. ဂုာ်ကျဲးစၢးမၤဝဲလၢ ယွၤအမူခိၣ်ကလူးသ့ၣ်တဖၣ်ဒၣ်လဲာ် ကမၤတၢ်အၢအဂီၢ်န့ၣ်လီၤ. လၢခံန့ၣ် မူခိၣ်ကလူးတနီၤ ဒိကနၣ်ထီၣ်ဝဲ စၤတၣ်အတၢ်ကတိၤန့ၣ်လီၤ. ဆိကတီၢ်ဝဲသ့ၣ်တၢ်မၤလၢ ယွၤမၢအီၤ လၢအကမၤဝဲသ့ၣ်လၢမူခိၣ်န့ၣ်လီၤ. ဒီးဟဲလီၤဝဲသ့ၣ်ဆူဟီၣ်ခိၣ် ဒီးဟံးန့ၢ်ပှၤကညီအနီၢ်ကစၢ်တဖၣ်လၢအဂီၢ်လီၤ. ဘၣ်မနုၤဘၣ်မၤဝဲသ့ၣ်ဒ်န့ၣ်လဲၣ် နသ့ၣ်ညါဧါ.
လံာ်စီဆှံစံးဝဲဒၣ်လၢ ယွၤအဖိခွါတဖၣ်ထံၣ်ဝဲ ပိာ်မုၣ်ဃံလၤ လၢအအိၣ်လၢဟီၣ်ခိၣ်ချၢတဖၣ်ဒီး အဲၣ်ဒိးအိၣ်ဃုာ်ဝဲလၢ မုၣ်ဃံလၤတဖၣ်န့ၣ်လီၤ. ဒ်န့ၣ်အဃိ အဝဲသ့ၣ်ဟဲလီၤဆူဟီၣ်ခိၣ်ဝံၤ ဟံးန့ၢ်ဝဲပိာ်မုၣ်ဃံလၤတဖၣ်န့ၣ်လီၤ. တၢ်မၤတၢ်ဒ်အံၤန့ၣ် လံာ်စီဆှံစံးဝဲဒၣ်လၢ ကမၣ်လီၤ. ဘၣ်မနုၤလဲၣ်န့ၣ် ယွၤတ့လီၤပာ်လီၤဝဲ မူခိၣ်ကလူးတဖၣ် လၢအကအိၣ်လၢမူခိၣ်အဂီၢ်အဃိန့ၣ်လီၤ.
မူခိၣ်ကလူးတဖၣ်ဒီး အမါတဖၣ် မၤန့ၢ်အဖိအခါ ဖိတဖၣ်အံၤလီၤဆီဝဲလီၤ. လၢအခီၣ်ထံးတခီ တလီၤဆီကဲၣ်ဆိးဘၣ်. ဘၣ်ဆၣ် လၢခံန့ၣ် ဒံးယံာ်ဒံးဒိၣ်ထီၣ်ဝံၤ ဒံးယံာ်ဒံးဆူၣ်ထီၣ်ဝဲသ့ၣ်လီၤ. ဒီးတုၤအဟဲကဲထီၣ် ဒိးတကါတစုန့ၣ်လီၤသၢၣ်.
ဒိးတကါဖးဒိၣ်တဖၣ်န့ၣ်အၢသီဒိၣ်မးလီၤ. အဝဲသ့ၣ်အနီၢ်ဒိၣ်ဒိၣ်, အဂံၢ်စ့ၢ်ကီးဆူၣ်အဃိ မၤနးမၤဖှီၣ် ပှၤဂၤလီၤ. မၤဆူၣ်မၤနၢၤတၢ်လၢ ပှၤကိးဂၤကအၢထီၣ် ဒ်အဝဲသ့ၣ်အသိးလီၤ.
ဃနိာ်သံဝဲလံ. ဘၣ်ဆၣ် ပှၤဂ့ၤတဂၤ ဟဲပၢၢ်ထီၣ်လၢဟီၣ်ခိၣ်ချၢလီၤ. ပှၤအံၤအမံၤမ့ၢ် နိအၤလီၤ. အဝဲဒၣ်န့ၣ်မၤဝဲ တၢ်မၤလၢယွၤအဲၣ်ဒိးအမၤဝဲ ထီဘိန့ၣ်လီၤ.
ဘၣ်မုၢ်တနံၤန့ၣ် ကစၢ်ယွၤတဲဘၣ်နိအၤလၢ ပှၤအၢပှၤသီသ့ၣ်တဖၣ် ကဘၣ်တၢ်မၤဟးဂီၤအီၤ အဆၢကတီၢ်ဘၣ်လံလီၤ. ဘၣ်ဆၣ်သနာ်က့ ကစၢ်ယွၤကမၤပူၤဖျဲးနိအၤ ဒီးအပှၤဟံၣ်ဖိဃီဖိတဖၣ်, ဒီးဆၣ်ဖိကီၢ်ဖိတဘျုးဒုလီၤ. ယွၤကမၤဝဲဒ်လဲၣ်. မ်ပကွၢ်သကိးတက့ၢ်.
