’Ba Izu Ruabe Okporu Tu ’Diyi Nyakua
A’DIKO 8
’Ba Izu Ruabe Okporu Tu ’Diyi Nyakua
’BA AZINI ka ta imu mivualeru isu de zozani mi jo ma abi ’buari be tro tro, mi ta ega ngoni ya? Agu ’da ta ovu ’ba izu ruabe azini okpobe tu ri ’i! Ndra drio ’ba izu ruabe azini okpobe tu ’diyi ndra nyakua ci. Biblia ece amani kini ’ba yi ma ati ru ’diyi ndra malaika engapi ’bua ’diyi. Te ’di eco ndra ’i ’ye ngoni ngoni?
Mi eco ega ra kini Satani ni ndra mu e’yo ezaza be drile. Le ndra vini malaika Munguni ’diyi ma ecaki onzi indi. Sawa azini ma vutia, malaika ’diyi ma azi e’doki ndra Satani ma ti eri. Kuki azi ndra Munguni fe eyini nga ’bua ’dale ri. Imuki di ani nyakua azini edeki rua ’ba ada vuri yini. Mi ni ’yeki ’dini a’du e’yosi’ari ra ya?
Biblia ece amani kini asisileni ri anzi Munguni ’diyi neki ndra oku nyakua ’diyi ndrizaru tu ani leki di ndra imu o’a yi pie. Imuki di ani nyakua azini o’duki di oku ’diyi eyi ni oku ru. Biblia ’yo amani kini afa eyini ’ye di ndra onzi, a’dusikuni Mungu ede ndra malaika yi o’azu ’bua.
Malaika ’diyi ni anzi isuzu oku eyini ’diyi pie ria, anzi ’diyi ndra ndu. Edaki ni ndra ndu e’doria ku. Te muki drile zozu ambo azini okpobe, kpere eyini ecazu ’ba izu ruabe okporu tu ’diyi ru.
’Ba izu ruabe okporu tu ’diyi ndra onzi. Yini ndra ovuzu ambo azini okpobe tu risi, eyi ndra e’yo onzi ’ye ’ba ma rua. Yi ndra okpo ayu ecozu lezu fezu ’ba driani ecazu onzi ekile eyi le.
Isu de Enoka dra ’bo, te agupi azi muke ni ndra nyakua ci. Eri ma ru ndra Noa ’i. Eri ndra sawa driasi e’yo Munguni le ’diyi ’ye ’i.
O’du azini alu Mungu ’yo ndra Noa ni kini sawa ecadi Ini ’ba onzi ’diyi ma dri jazu dria ’bo. Te Munguni ndra mu Noa piki pa ’ba erivu akua ’diyi pie azini anyapa kakau pie. Ama ma neki nga geri Munguni ndra e’yo ’di ’yezu ri.
