Vikishikishi VahaMavu
Chihande 8
Vikishikishi VahaMavu
KACHI nge mumona mutu ali nakwiza kulyove wakutaluka nakuheta mukasongwa kazuvo yove, mumushinganyeka kupweya? Mutu kana nahase kupwa chikishikishi! Kushikulu chikuma, hamavu hapwile vikishikishi. Mbimbiliya yalumbununa ngwayo masevo vapwile vangelo vaze vafumine mwilu. Chapwile ngachilihi ngocho?
Nawanuka, kangelo wamupi Satana apwile lika nakuneha ukalu. Aputukile nakuhungumwisa jino vangelo jaKalunga mangana vapwenga vavapi. Kutwala muze, vangelo vamwe vaputukile kumwitavila Satana. Mulimo vavahanyine kuzata mwilu kuli Kalunga hinjongolo. Kaha vejile hamavu nakulyalumuna mumijimba yautu. Unejiva chuma valingililile ngocho tahi?
Mbimbiliya ngwayo mwomwo vana vaKalunga vamwene mapwevo vamwaza hano hamavu kaha vasakile kutwama navo. Ngocho vejile hamavu nakumbata mapwevo kana. Mbimbiliya yamba ngwayo echi chapwile chakuluwa, mwomwo Kalunga atengele vangelo mangana vatwamenga mwilu.
Jino vakemba vasemukile kulyava vangelo namapwevo javo, valihandunwine kuvakemba vakwavo. Pamo hakavanga chihandwa kachasolokele chikumako. Oloze vatwalileho lika nakupama, nakutakama nawa, palanga nomu vapwile jino hivikishikishi.
Vikishikishi kana vapwile vavapi. Vavulumwinenga vatu mwomwo vapwile vakupama nakutakama chikuma. Vapwile nakukanjikiza vatu vosena vapwenga vavapi chiwenya vakivo.
Numba tuhu Enoke afwile, oloze hamavu hapwile mutu wakwoloka weka nawa. Lijina lyenyi ikiye Nowa. Alingilenga vyuma vyosena asakilenga Kalunga.
Likumbi limwe Kalunga alwezele Nowa nge Anakusaka jino kunongesa vatu vavapi vosena. Oloze Kalunga asakile kuyovola Nowa natanga yenyi natunyama vavavulu. Tutalenu mwalingile Kalunga.