Tasba Ra Upla Tara Nani Bara Kan
Sturka 8
Tasba Ra Upla Tara Nani Bara Kan
UPLA kum uba yari kan, lal banhta ba utla bahna ra kangbaia man kan, wapi man ra aula sa kaikma kaka, dia lukma ki? Upla tara kum lukma, rait apia? Pyu kum tasba ra rait upla tara nani bara kan. Baibil bila witin nani aisika ba heven ra insal iwi nani ba kan wisa. Sakuna nahki muni baku takan?
Amya tikpara, Setan insal saurakira ba mita pât ailal dauki kan ba. Witin Gâd insalka nani pali ra kat sin saura sakaia trai kaikan. Bara pyu nani luan bara insal kum kum nani ba Setan bila walan. Gâd witin nani dukyara wark heven ra bri kan ba lulki swisisi, upla baku taki tasba ra balan. Dia muni sapa nu sma ki?
Baibil bila witin nani tasba ra mairin painkira nani ba ra kan ba kaiki, ai maîa baku brih iwaia lukan wisa. Baha mita witin nani tasba ra bal mairka ba aikuki marit taki bangwan. Sakuna Baibil bila witin nani baha daukan ba pain daukras kan wisa, kan Gâd insal nani ba heven ra iwi kabia dukyara paskan kan.
Insalka nani ba ai maîa aikuki luhpa sahwi bangwan taim, luhpia nani ba sat aihka kan. Witin nani sirpi kan pyua ra baha ba kaikaia sip apia kan. Sakuna aima banira witin nani ba kau tara pawi bara kau karna taki, tnata kat upla tara taki bangwan.
Bara naha uplika tara nani ba uba saura kan. Tara bara karna kan ba mita, upla nani ra rau muni kan witin nani baku saura kabia dukyara.
Inok ba pruan. Sakuna tasba ra waitna pain kum bara kan. Noa nina maki kan. Witin Gâd dia daukbia want kan ba, ban dauki kan.
Yu kum Gâd mita Noa ra win, witin upla saura nani sut ra sauhki tikai ba pyua aimakan ba dukyara. Sakuna Noa ai pamalika bara daiwan nani ailal ra lika swaki sakaisa win. Kaisa Gâd naha ba nahki daukan sapa kaikaia.
