Takamej tel uejueykej uan tel chikaujkej
Tanojnots 8
Takamej tel uejueykej uan tel chikaujkej
KOMO tikitaskia se takat tel uejkapantik uan maj tekit akini mochan, ¿keniuj timomachiliskia? ¡Timomoujtiskia! Seki xiujmej yekmelauj nenkej takamej tel uejueykej uan tel chikaujkej nikan Taltikpak. Biblia kinextia ika imin tatuan katkaj ángeles tein nemiaj iluikak. Sayoj ika, ¿keniuj mochiuak nejin?
Xikelnamiki ika Satanás, nejon ángel tein amo yolkuali, kinchiujtoya taltikpakneminij maj mochiuakan amo yolkualmej. Uan no kitemojtoya keniuj iángeluan Dios maj mochiuakan amo yolkualmej. Keman panok tonalmej, sekin ángeles kitajtolkakkej Satanás. Kikaujkej tekit tein Dios kinimakatoya iluikak. Ualajkej nikan Taltikpak uan mochiujkej taltikpakneminij. ¿Tikmati keyej?
Biblia kijtoua ika porin kinitakej siuamej kualtsitsin nikan Taltikpak uan kinekkej nemiskej imiuan. Yejika ualajkej uan monamiktijkej imiuan. Biblia kijtoua ika tel amo kuali tein kichiujkej nejon ángeles, porin Dios kinchijchiujka maj neminij iluikak.
Keman nejon siuamej kinpiakej konemej, amo moitaya ox eskiaj tamamej. Sayoj ika keman peuak uejueyiaj moitak ika kemaj katkaj tamamej, porin kisentokayaj moskaltiayaj uan moskaltiayaj uan mochiujtiayaj okachi chikaujkej, uan ika tamik, mochiujkej takamej tel uejueykej uan tel chikaujkej.
Katkaj tel amo yolkualmej. Uan kemej katkaj tel uejueykej uan tel chikaujkej, iminka mauiltiayaj taltikpakneminij. Nochin kinchikaujkauiayaj maj kichiuakan tein amo kuali.
Satepan keman momikilij Enoc, nemik se takat tein katka yolkuali. Nejin takat motokaytij Noé. Yej nochipa kichiuaya tein Dios kinekia maj kichiua.
Se tonal Dios kiiluij Noé ika amo uejka poliuiaok, uan kinixpoloskia taltikpakneminij tein amo yolkualmej. Sayoj ika, Dios kinimakixtiskia Noé, ichankauan uan miak tapialmej. Maj tikitakan keniuj kinimakixtij.
