INKHA omunthu umue omulemule ngo ondyuo yove ukahi nokuiya nokuove, oityi mosoko? Mosoko okuti omunthu ou, ekihi. Kohale ankho kuali tyili omakihi kombanda yoohi. Ombimbiliya itupopila okuti omakihi ankho ovana vonoandyu. Otyo tyaenda ñgeni?

Hinangela okuti oandyu oombi Satanasi ankho yasukalala nokueta ovitateka. Yaovola alo umue okuyapula onoandyu mba Huku opo mbukale onondingavivi. Onoandyu mbumue ambuhimbika okutehelela Satanasi. Ambuyekepo ovilinga Huku embupele keulu. Iya ambulipilulula omalutu ovanthu ambuya pano pohi. Ove utyii omokonda yatyi?

Ombimbiliya ipopia okuti omokonda ovana ovo va Huku vamona ovakai ovawa pano pohi, iya avahande okukala navo. Ngotyo, veya pano pohi avanepe ovakai ovo. Ombimbiliya ipopia okuti otyipuka otyo valinga otyivi. Mokonda Huku walinga onoandyu opo mbukale keulu.

Puetyi onoandyu novakai vambo vatyita ovana, ovana ovo ankho velikalela. Etyi ankho ovatutu kavamoneka okuti velikalela unene. Anthi, vatualako okukala ovanene, nokupama unene, alo vakala omakihi.

Omakihi oo, ankho onondingavivi. Iya mokonda ankho ovanene unene nokuapama unene, ankho vatyopa ovanthu. Tupu ankho vakuluminya ovanthu okukala onondingavivi ngavo.

Enoke opo ankho wankhiale. Anthi ankho kuna omulume omukuavo ondalawa pano pohi. Enyina liae o Noe. Apeho ankho ulinga etyi Huku ahanda.

Onthiki imue Huku watolela Noe okuti omuvo wehikapo wokuhanyaunako onondingavivi. Anthi apopi okuti mayovola Noe, nombunga yae, novinyama ovinyingi. Tutalei oñgeni Huku etyilinga.