XIꞌMU̱ gi nthe̱ui nꞌa rä jäꞌi näꞌä xi xä ñhetsꞌi asta di ñhe̱hui ri nguu, ¿te ma gi mbeni? ¡Ge xi nꞌa rä däta jäꞌi! Bi nja nꞌa rä pa nuꞌmu̱ bi mꞌu̱ ha rä Xiꞌmhai rꞌa yä jäꞌi nuꞌu̱ xa mñä däta. Rä Mäkä Tꞌofo mää ge rꞌa yä e̱nxe̱ de mähetsꞌi geꞌu̱ mñä yä dada nuꞌu̱ yä däta jäꞌi. Pe, ¿hanja bi nja?

Beni, näꞌä rä tsꞌo e̱nxe̱ tꞌembi rä Zithu go geꞌä mi o̱tꞌe yä xuñha. Mi ne dä japi dä mbo̱ka yä e̱nxe̱ Äjuä. Mꞌe̱fa, rꞌa yä e̱nxe̱ bi mu̱di bi de̱ni rä Zithu. Bi zopu̱ nuꞌu̱ yä ꞌme̱fi mi pe̱ꞌtsi ha mähetsꞌi. Bä käi ha rä Xiꞌmhai ꞌne bi njäꞌi. ¿Gi pädi por hanja?

Rä Mäkä Tꞌofo mää ge nuꞌu̱ yä e̱nxe̱ bi hyandi nuꞌu̱ yä ꞌme̱hñä xa mi tsꞌu̱ngänza mi ꞌmu̱i ha rä Xiꞌmhai ꞌne nuꞌu̱ yä e̱nxe̱ bi ne dä mꞌu̱hui. Hänge bä käi de mähetsꞌi ꞌne bi nthätui nuꞌu̱ yä ꞌme̱hñä. Rä Mäkä Tꞌofo mää ge xä ntsꞌo näꞌä bi me̱fi ngeꞌä Äjuä bi hyoki yä e̱nxe̱ pa dä mꞌu̱i ha mähetsꞌi.

Mi me̱ꞌtsi yä bätsi nuꞌu̱ yä tsꞌo e̱nxe̱ ko nuꞌu̱ yä ꞌme̱hñä, nuꞌu̱ yä ꞌue̱ne mi nꞌañꞌo. Ri mu̱di hingä xa mi nheki ge mi nꞌañꞌo. Pe bi mu̱di bi te ꞌne bi te, asta xa bi te yä nda däta jäꞌi ꞌne xa mi tse̱di.

Nuyu̱ yä nda däta jäꞌi xa mñä tsꞌomꞌu̱i. Koꞌmu̱ xi xmä ñhetsꞌi ꞌne xa mi tse̱di, mi u̱ni ꞌne mi fe̱tꞌi yä jäꞌi. Mi ne dä japäbi yä jäꞌi dä ntsꞌomꞌu̱i ja nguꞌu̱.

Rä Enok ya xki du, pe bi mꞌu̱ nꞌa rä ñꞌo̱ho̱ ha rä Xiꞌmhai näꞌä mrä hojäꞌi. Näꞌä rä ñꞌo̱ho̱ mrä thuhu rä Noe. Näꞌä nzäntho mi o̱tꞌe gatꞌho näꞌä mi mändabi Äjuä.

Nꞌa rä pa, Äjuä bi xipi rä Noe ge ya xki zo̱ho̱ näꞌä rä pa xki hñutsꞌi pa dä huati gatꞌho nuꞌu̱ yä tsꞌomꞌu̱i jäꞌi. Pe Äjuä ma xä ñäni rä Noe ꞌne gatꞌho rä familia ꞌne ndunthi yä zuꞌue. Ma gä handihu̱ hanja bi ja.