WE KʼO jun winaq kpe awukʼ sibʼalaj nim raqan junam rukʼ jun cheʼ, ¿su kabʼij at chirij wariʼ? ¡Kaxibʼij awibʼ che! E kʼo täq qʼij che qastzij xekʼejeʼ wanikʼaj winaq riʼ cho ruwäch Ulew. Ri Loqʼalaj Pixabʼ kukʼutu che ri kitat e ángeles e kʼo ojer pa ri kaj. ¿Suche xubʼan wariʼ?

Masach pa ajolom che are Satanás ri itzel ángel xubʼan täq kʼäx. Xraj che ri ángeles rech ri Ajawaxel kkebʼan itzel. Qʼaxnäq ri qʼij e kʼo jujun täq ángeles xeʼok che utaʼik su kubʼij ri Satanás. Xkeya kan ri chak che ri Ajawaxel uyaʼom chike pa ri kaj. Xepe cho ruwäch Ulew tekʼuriʼ xkebʼan winaq che kibʼ. ¿Awetaʼm suche?

Ri Loqʼalaj Pixabʼ kubʼij che rumal che xkil ri utzalaj (tzʼoʼy) täq ixoqibʼ cho ruwäch Ulew xkaj xekʼejeʼ kukʼ. Rumal laʼ xeqaj loq tekʼuriʼ xekʼuliʼ kukʼ. Ri Loqʼalaj Pixabʼ kubʼij che utz täj su xkebʼano, rumal che ri Ajawaxel xeʼubʼan wa täq ángeles rech kekʼejeʼ pa ri kaj, rech täj kepe cho ruwäch Ulew.

Chiʼ ri täq ángeles xuqujeʼ ri täq kixoqil xkʼejeʼ kalkʼwal, jun wi kekaʼyik. Xkeya ta kan kikʼiyik xuqujeʼ kʼo nim kichoqʼabʼ.

Wa nikʼaj achijabʼ riʼ e itzel. Rumal che e nimaʼq xuqujeʼ nim kichoqʼabʼ, xkebʼan kʼäx chike ri winaq. Xkekoj kichoqʼabʼ rech konojel xkebʼan itzel täq winaq junam kukʼ e areʼ (kë).

Ri Enoc kamnäq chik, tekʼuriʼ kʼo jun utzalaj achi cho ruwäch ri Ulew. Wajun achi ubʼiʼ Noé. Xubʼano chike täq xuta ri Ajawaxel che.

Pa jun qʼij ri Ajawaxel xubʼij che ri Noé che xopan ri qʼij che kusach kiwäch konojel ri itzel täq winaq. Tekʼuriʼ ri Ajawaxel xukʼol na ri Noé xuqujeʼ ri ufamilia xuqujeʼ kʼi chike täq chiköp. Chqilaʼ su xubʼan che.