¿IMAYNATAM sientekuwaq?, runa wasikipa qatanmanta aswan hatunraq qanman asuykamusuptiki. ¡Mancharikuwaqchá! Chayna runakunam ñawpa tiempopi kay Allpapiqa karqaku. Bibliam qawachin taytankuqa hanaq pachapi kaq angelkuna kasqanta. ¿Imaynataq chayqa karqa?

Yuyariy, Satanasmi mana allinkunata rurachkarqa. Diospa angelninkunatapas mana allinkunata ruranankupaqmi engañachkarqa. Tiempopa pasasqanman hina wakin angelkunatapas Satanasqa engañarurqa. Hanaq pachapi Diospa kamachisqanta saqerurqaku. Allpa pachaman hamuruspanku runa hina cuerpoyoqña karqaku. ¿Yachankichu imanasqataq?

Bibliaqa ninmi: Allpapi buenamoza warmikunata qawaramuspanku paykunawan casarakuyta munarqaku. Chaymi Allpaman hamuruspanku paykunawan casarakurqaku. Bibliaqa ninmi chay rurasqankuqa mana allin kasqanta, Diosmi angelkunata unancharqa hanaq pachapi kawsanankupaq.

Angelkunapa warminkuna wawakunata wachakuruptinku, mana wakin wawakuna hinachu karqaku. Warmallaraq kachkaspankuqa warmamasinkuna hinachá karqaku. Hinaptinmi wiñayta qallarirqaku, hatunkaray kallpasapa runakuna kanankukama.

Chay runakunam mana allinta ruraq karqaku. Hatunkaray kallpasapa kasqankuraykum runakunata ñakarichirqaku. Hinaptinmi paykuna hina ruranankupaq runakunatapas obligarqaku.

Chay tiempopaqqa Enocqa wañurusqaña, Allpapim ichaqa huk runa allin ruraq karqa. Chay runaqa Noey sutiyoqmi karqa. Payqa Diospa nisqanman hina ruraqmi karqa.

Diosmi Noeyta nirqa mana allin runakunatam puchukachisaq, nispa. Noeytam ichaqa aylluntinta hinaspa achka animalkunatawan salvanan karqa. Qawasunchik imaynatam chayta rurarqa.