AARAI elosi itunganan kobuni mamakon, ido ooja adolore obibiru lo etogokon, anyoika iwoomoomei ijo? Erai etunganan ngol lokos! Kapak adiopet, ajaasi itunga lukos toma akwap. Itodunit Ebaibuli ebe luka papakec araasi imalaikan luapote kokuju. Konye opone ani apedorotor ngun?

Kiitu ber ebe Satan emalaika lo arono abu kokukuranara kowai lo aitolom atiokisio. Atamit da bobo airiar imalaikana luka Edeke araun luarokok. Kotoma apac natupakin, apotu ice komalaikan kangul ogeutu opupokin nu enera Satan. Apotu kojalakisi aswam nainakinit Edeke kesi kotoma akuj. Apotu odokutu kwap kosodete ainap awate nuka itunga. Ijeni ijo kanukinyo?

Ebala Ebaibuli ebe naarai apotu odwe luka Edeke lu, koanyutu angor nutemel kotoma akwap kosodete akotokin aiboi kakes. Aso apotu kopotu akwap kosodete aimany angor nuu. Ebala Ebaibuli ebe mam nu adolito naarai iswamat Edeke imalaikan aiboi kokuju.

Keurununutu imalaikan lu ka angor kec imukerun, etegelikina imukerun lu. Kangeunet, etei bala mam etegelikina. Konye apotu kiyatakisi apoloor ido agogongoor kiton ne araunatar lukos.

Aroko lukos lu ido naarai apolok ido ogogong da, apedorete aimusung itunga. Atamitos abuikin nginitunganan kere araun yen arono kwape kakesi.

Adaunit Enok atwanare, konye ajaai ediopetunganan akwap aparasia nu lo ajok. Ekiror etunganan alo nges Noa. Eswamaenenei duc nu akoto Edeke nges aswam.

Adiopepaaran abu Edeke olimok Noa ebe adolu apak na Ngesi amudiar itunga kere luarokok. Konye alosi Edeke aitajar Noa, ekekale ka itiang luipu. Aso kaanyutu epone lo eswamaa Edeke nuu.