Makani 8: Babbabbani Munyika
IKUTI muntu umwi keenda kuzya kuli nduwe alimwi kali mulamfwu kusikila kuciluli caŋanda yanu, ino ncinzi ncokonzya kuyeeya? Ncokonzya kuyeeya ncakuti muntu ooyo mubbabbani! Ncobeni aciindi cimwi anyika kwakali babbabbani. Ibbaibbele litondezya kuti bama swaabo bakali bangelo bakazwa kujulu. Aboobo, ino eeco cakali kukonzyeka buti?
Koyeeya kuti mungelo mubi Saatani wakajisi bubi kuvwuzya mapenzi. Alimwi wakali kusoleka nibaba bangelo ba Leza kuti ababisye. Nikwakainda ciindi, bamwi bangelo bakatalika kumumvwida Saatani. Bakacileka kubeleka mulimo Leza ngwaakabapa kucita kujulu. Bakaboola anyika akuba amibili yabantu. Hena ulicizyi ncobakacitila boobo?
Ibbaibbele lyaamba kuti nkaambo kakuti aaba bana ba Leza bakabona basimbi babotu anyika, aboobo bakali kuyanda kuti kabakkala limwi. Aboobo bakaboola anyika akukwata basimbi aaba. Ibbaibbele lyaamba kuti eeci cakali cibi nkaambo Leza wakapanga bangelo kuti kabakkala kujulu.
Ibangelo abamakaintu babo nibakaba abana, bana aaba bakaliindenyi abana bamwi. Kumatalikilo balakonzya kuti tiibakali kulibonya kwiindana kapati. Pele bakazumanana kukomena akuba basinguzu kapati kusikila limwi baba babbabbani.
Aaba babbabbani bakali babi. Akaambo kakuti bakali bapati alimwi bakalijisi nguzu, bakali kukonzya kupenzya bantu. Bakasoleka kusinikizya muntu aumwi kuti abije mbuli mbabo.
Aciindi eeco Enoki wakalifwide, pele kwakali muntu omwe anyika wakali kabotu. Izina lyamuntu ooyu wakali Nowa. Lyoonse wakali kucita kufwumbwa eeco Leza ncaakali kuyanda kuti acite.
Buzuba bumwi Leza wakaambila Nowa kuti casika ciindi Cakwe cakuti anyonyoone bantu boonse babi. Pele Leza wakali libambide kumufwutula Nowa abamukwasyi wakwe abanyama banji. Atubone Leza mbwaakacita eeci.
Matalikilo 6:1-8; Juda 6.
Mibuzyo
- Ncinzi cakacitika bangelo bamwi ba Leza nibakamumvwida Saatani?
- Nkaambo nzi bamwi bangelo ncobakaleka mulimo wakujulu akuboola anyika?
- Nkaambo nzi ncocatakali kabotu kubangelo kuboola anyika akuba amibili yanyama?
- Nkwiindana kuli buti kwakaliko kubana babangelo?
- Mbuli mbobona acifwanikiso, ncinzi bana babangelo ncibakacita nibakakomena akuba babbabbani?
- Naakafwa Enoki, ino muntu nzi wakali kabotu wakapona anyika, alimwi nkaambo nzi Leza ncaakali kumuyanda?
Mibuzyo aimwi
- Bala Matalikilo 6:1-8.
Mbuti Matalikilo 6:6 mbwatondezya kulilemeka kwesu mbokukonzya kumujatikizya Jehova? (Int. 78:40, 41; Tus. 27:11)
- Bala Juda 6.
Mbuti bangelo ‘bakazwa kujulu’ mumazuba aa Nowa mbocili ciyeekezyo kuli ndiswe sunu? (1 Kor. 3:5-9; 2 Pita 2:4, 9, 10)
