KON may-ada dumaop ha imo nga pariho an kahitaas ha alkuba han iyo balay, ano an mahuhunahuna mo? Sigurado nga mahuhunahuna mo nga higante ito nga tawo! Hadto, may-ada gud mga higante ha tuna. An Biblia nagsusumat nga an ira mga amay mga anghel tikang ha langit. Kondi, paonan-o ito nahitabo?

Hinumdumi nga an maraot nga anghel nga hi Satanas okupado ha pagbuhat hin maraot. Gin-aghat pa ngani niya an mga anghel han Dios nga magin maraot. Inabot an panahon, an iba ha ira namati kan Satanas. Waray na nira buhata ha langit an ginpapabuhat ha ira han Dios. Ngan kinanhi hira ha tuna ngan nagsul-ot hin tawhanon nga lawas. Maaram ka ba kon kay ano?

An Biblia nasiring nga tungod ito kay nakita hini nga mga anak han Dios an maghusay nga kababayin-an ha tuna ngan karuyag nira nga makaupod ini nga kababayin-an. Salit an mga anak han Dios kinanhi ha tuna ngan gin-asawa hira. An Biblia nasiring nga sayop ini tungod kay ginhimo han Dios an mga anghel basi mag-ukoy ha langit.

Han nagkaanak ini nga mga anghel ngan an ira mga asawa, naiiba an ira mga anak. Ha tinikangan, baga hin diri hira naiiba. Kondi, nagtikadagku gud hira, ngan nagtikakusog gud, tubtob nga nagin mga higante.

Magraot ini nga mga higante. Ngan tungod kay dagku ngan magkusog gud hira, ginpapakurian nira an mga tawo. Ginpipirit nira an ngatanan nga magin maraot pariho ha ira.

Patay na hi Enok, kondi may-ada usa nga tawo ha tuna nga maopay. Ini nga tawo amo hi Noe. Ginbubuhat niya pirme an iginsusugo han Dios.

Usa ka adlaw, ginsumatan han Dios hi Noe nga bubungkagon na Niya an ngatanan nga magraot nga tawo. Kondi tatalwason Niya hi Noe, an iya pamilya ngan an damu nga hayop. Aton kitaon kon paonan-o ini ginbuhat han Dios.