Tantara 8

Olo Befatiarin̈y Tambony Tany

IZIKOA misy olo lava be, alavasany mipaka amy tafontran̈o, mandalo marikitry anao, karakôry eky ataonao? Olo befatiarin̈y zen̈y, sa karakôry? Navy nisy tambony tany teto olo karaha zen̈y. Baiboly man̈ambara fa baban-drô anjely boaka tan-dan̈itry. Karakôry eky nampanety zen̈y?

Alaiva onon̈o fa Satana tia mamitaka. Ndray anjelin’ny Zan̈ahary tan-dan̈itry tan̈y mbala voafitakany fo. Nisy anjely sasany nan̈araka volan̈a Satana. Irô tsy nan̈ano asa nirahin’ny Zan̈ahary eky. Irô baka iô nijotso tan-tany tatỳ, nanjary olo. Hainao ino antony?

Baiboly mivolan̈a fa irô nahita man̈angy tsara tambony tany tatỳ, ke tian-drô hipetraka miaraka amin-drô. Irô baka tiô nijotso tambony tany, nanambady man̈angy aby io. Baiboly mivolan̈a fa ratsy raha nataon-drô zen̈y, fôtony anjely tôkony an-dan̈itry an̈y fo.

Izikoa fa nanan-janaka anjely aby io, zanakan-drô tsy niran̈a tsaiky jiaby. Irô vo teraka karaha olo jiaby fo. Fa irô baka tiô nahaibe ndreky nahaifatatra, zisk’irô befatiarin̈y be.

Irô io nanjary ratsy fan̈ahy. Irô mitôron̈o tsibebe, ke mampijaly olo fo asan-drô. Faorisen-drô olo jiaby han̈ano raha ratsy karaha irô.

Enoka naty, fa nisy olo araiky tsara fan̈ahy tambony tany. Noa an̈arany. Izy nan̈ano zay raha nan̈irahan’ny Zan̈ahary izy.

Andra araiky, Zan̈ahary nivolan̈a tamy Noa fa han̈adoso olo ratsy fan̈ahy jiaby. Zan̈ahary nan̈ano raha hamonjian̈a Noa, ndreky vadiny ndreky ry zanany, ndreky biby maro. Atsika hizaha karakôry nan̈anaovan’ny Zan̈ahary zen̈y.

Genesisy 6:1-8; Joda 6.