AGAMBE ganisya mundu jwine jwamlewu mnope mpaka kumsakasa kwa nyumba jawo ali mkwika kwali wawojo, ana ngaŵa mkwakamula ndetemu? Mwangakayicila mpaka syakamule! Ndaŵi jine kalakalako, pacilambo capasici papali ŵandu ŵeleŵa. Ŵaliji ŵelewu, soni ŵamacili mnope. Baibulo jikusalosya kuti atati ŵa jemanjaji ŵaliji malayika gakwinani. Nambo ana yeleyi yakombolece catuli?

Akumbucile kuti lilayika lyakusakala Satana lyatendekasyaga yakusakala. Satana ŵalingagalingagasoni kugatendekasya malayika ga Mlungu kuti gaŵe gakusakala. Mkupita kwandaŵi, malayika gane gatandite kumpikanila Satana. Malayikaga galesile kamula masengo gaŵapele Mlungu kwinani. Ni gayice pacilambo capasi, nikulipanganyicisya jika yilu yaumundu. Ana akumanyilila ligongo lyakwe?

Baibulo jikusasala kuti lyaliji ligongo lyakuti ŵanace ŵa Mlunguŵa ŵaweni acakongwe ŵakusalala pacilambo capasi ni ŵasakaga kuti atameje nawo. Ni ŵayice pacilambo capasi nikulombela acakongwe ŵala. Baibulo jikusasala kuti yeleyi yaliji yakulemweceka, ligongo Mlungu ŵagapanganyisye malayika kuti gatameje kwinani.

Ŵanace ŵaŵapagwaga kwa Malayika ni acakongwe ŵala, ŵaliji ŵakulekangana ni ŵanace ŵane. Kundanda ali ŵacinandipile nganawonekaga kulekangana mnope ni ŵanace ŵane wosope. Nambo ŵagambaga kwendelecela kula, soni kola macili mnope, mpaka kuŵa acakulungwakulungwa mnope.

Ŵandu ŵamacili mnopeŵa ŵaliji ŵakusakala. Pakuŵa ŵaliji ŵakulungwa mnope soni ŵamacili, ŵawulasyaga ŵandu. Ŵamkanganicisyaga jwalijose kuti aŵe jwakusakala mpela jemanjajo.

Enoki ŵaliji ali awile, nambo sambano paliji pana mundu jwine jwambone mpela jwalakwejo pacilambo capasi. Munduju lina lyakwe lyaliji Nowa. Jwalakwejo ndaŵi syosope ŵatendaga yaŵasakaga Mlungu.

Lisiku line Mlungu ŵamsalile Nowa kuti ndaŵi jikwanile jakuti ajonanje ŵandu wosope ŵakusakala. Nambo Mlungu ŵasakaga kumkulupusya Nowa ni liŵasa lyakwe, soni yinyama yine yejinji. Kwende tulole mwaŵatendele yeleyi.