NOÉ oguerekovaʼekue hembireko ha mbohapy itaʼýra. Itaʼyrakuéra héra Sem, Cam ha Jafet. Haʼekuéra hembireko avei. Upéicharõ, Noé famíliape oĩvaʼekue ocho persóna.

Koʼág̃a Ñandejára ojapouka Noépe peteĩ mbaʼe neʼĩrava ojehecha. Heʼi chupe ojapo hag̃ua peteĩ árka tuicháva. Pe árka tuicha peteĩ várkoicha, péro ojoguave peteĩ káha puku guasúpe. ‘Oguerekovaʼerã tres píso’, heʼi Ñandejára, ‘ha embokoty heta’. Umi koty Noé ha ifamíliape g̃uarã, animalkuérape g̃uarã, ha oñeñongatu hag̃ua tembiʼu enterovépe g̃uarã.

Ñandejára heʼi Noépe ojapo hag̃ua pe árka oikeʼỹ hag̃uáicha pype y. Heʼi: ‘Aguerúta peteĩ dilúvio guasu ha ahundipaitéta ko múndo. Noĩriva pe árkape omanóta’.

Noé ha itaʼyrakuéra iñeʼẽrendu Jehovápe ha oñepyrũ ojapo pe árka. Péro umi hénte opukánte. Osegi iñaña hikuái. Avave ndogueroviái Noépe heʼírõ guare mbaʼépa ojapóta Ñandejára.

Pe árka tuichaiterei, ha upévare ogueraha heta tiémpo ojejapo hag̃ua. Ojejapopa heta áño ohasa rire. Koʼág̃a Ñandejára heʼi Noépe omoinge hag̃ua hyepýpe umi animalkuéra. Heʼi chupe omoinge hag̃ua heta animál apytégui mokõi, peteĩ mácho ha peteĩ kuña. Péro umi ótro reheguáva, Ñandejára heʼi omoinge hag̃ua siete. Ñandejára heʼi avei Noépe omoinge hag̃ua pype opaichagua guyra. Ha Noé ojapo Ñandejára heʼihagueichaite.

Upéi, Noé ha ifamília oike avei pe árkape. Upémaramo Ñandejára omboty pe árka rokẽ. Noé ha ifamília ohaʼarõ hyepýpe. Epensamína nde reimeha upépe ha rehaʼarõhareína avei. Oúnepa pe dilúvio heʼihaguéicha Ñandejára?