Noa ma tungu otjitendeze
EHUNGI 9
Noa ma tungu otjitendeze
NOA wa ri nomukazendu novazandu vetatu. Omana wovazandu ve ya ri Sem, Ham na Jafet. Nu auhe wovazandu mba wa ri nomukazendu. Mena ranao meṱunḓu raNoa mwa ri ovandu hambondatu.
Mukuru nambano wa ungurisa Noa otjiṋa otjikumise. Eye we mu raera kutja nga tunge otjitendeze otjinene. Otjitendeze tja ri otjinene otja oskepi, nungwari otjo aatji munika aayo otjikesa otjinene nu otjire. Mukuru wa raera Noa: ‘Tjitunga oure wozondendeko ndatu kombanda nu twamo omatuwo mutjo.’ Omatuwo ya ri oya Noa neṱunḓu re, novipuka, novikurya owo avehe mbi mave hepa.
Mukuru wina wa raera Noa okuṱuna otjitendeze nawa kokutja omeva aye ha zizire mu tjo. Mukuru wa tjere: ‘Ami me eta omupupo omunene womeva nu e yandeke ouye auhe. Auhe ngu he ri motjitendeze ma ṱu.’
Noa novazandu ve va puratena ku Jehova nu ave utu okutunga. Nungwari ovandu varwe aave yoro. Owo va ririra ko ovavi. Kape nomundu ngwa kambura mu Noa indu tje ve raera imbi Mukuru mbi ma tjiti.
Mena rokutja otjitendeze tja ri otjinene, tja kambura oruveze orure okutjitunga. Korusenina, kombunda yozombura ozengi, otjo tja manuka. Okuzambo Mukuru wa raera Noa okuhitisa ovipuka motjitendeze. Mukuru we mu raera kutja tjiva vyovipuka nga hitise kovivarivivari, otjirume notjikaze. Nungwari ovipuka vyarwe Mukuru we mu raera kutja nga hitise potuhambombari. Mukuru wina wa raera Noa okuhitisa omihoko pekepeke vyozonḓera azehe. Noa wa tjita atjihe Mukuru tje mu raera.
Okuzambo, Noa neṱunḓu re wina va hita motjitendeze. Tjazumba Mukuru wa pata omuvero. Moukoto, Noa neṱunḓu re va undja. Ripura kutja porumwe u ri motjitendeze puna wo, amo undju. Tjiri pa kara omupupo otja Mukuru pa heya?
