NOA aĩ na mũka na ana atatũ. Ana make meetawa Semu, Amu na Yavethi. Na kĩla ũmwe woo aĩ na mũka wake. Kwoou mũsyĩ wa Noa waĩ wa andũ nyaanya.

Ngai amwĩie Noa nĩeke ũndũ mũeni. Amwĩie ake ngalawa nene. Ngalawa ĩsu yaĩ nene ta meli, ĩndĩ yo yailyĩ ta ĩsandũkũ ĩnene yĩasa. Ngai amwĩie, ‘Mĩseũvye yĩthĩwe ngolova itatũ kuma nthĩ, na ũitilanga tũsũmba nthĩnĩ wayo.’ Tũsũmba tũu twaĩ twa kwĩkalwa nĩ Noa, mũsyĩ wake, na nyamũ. Na twakwia lĩu woo na wa nyamũ

Ĩngĩ Ngai nĩwamwĩie Noa aseũvye ngalawa ĩsu wĩthĩe ndĩlika kĩw’ũ. Ngai aisye: ‘Nĩngũete kĩw’ũ kingĩ ĩũlũ wa nthĩ kyanange nthĩ yonthe. Kĩla mũndũ ũtakethĩwa ngalawanĩ akakw’a.’

Noa na ana make nĩmamwĩwie Yeova na mambĩĩa kwaka. Ĩndĩ andũ ala angĩ makĩtaa o kũmathekeea. Maendeeie na kũthũka. Mayaamũĩkĩĩa Noa yĩla wameie ũndũ Ngai wakilyĩ kwĩka.

Nĩmaakie ngalawa ĩsu kwa ĩvinda yĩasa nũndũ yaĩ nene mũno. Na ĩtina wa myaka mingĩ, nĩyathelile kwakwa. Ĩndĩ Ngai amwĩa Noa nalikye nyamũ ngalawanĩ. Ngai amwĩie nalikye mĩthemba ya nyamũ ilĩ kwa ilĩ, nũme na nga. Ĩndĩ mĩthemba ĩngĩ ya nyamũ Ngai amwĩie nalikye mũonza. Ĩngĩ Ngai nĩwamwĩie Noa nalikye mĩthemba yonthe ya nyũnyi. Noa eekie o ũndũ Ngai wamwĩie.

Ĩtina wa ũu Noa na mũsyĩ wake nĩmalikile ngalawanĩ. Na Ngai avinga mũomo. Noa na mũsyĩ wake nĩmeeteelile me ngalawanĩ. Kwatata kũsũanĩa wĩ ngalawanĩ weteele vamwe namo. Kwa w’o nĩkwaĩ kwĩthĩwe na kĩw’ũ kingĩ o tondũ Ngai waĩtye?

Mwambĩlĩlyo 6:9-22; 7:1-9.