NUUWA ndoo nɔ lanɔɔ a puaa nda yaa. Diola puaa nduaa aa: Siɛm, Haam a Chefɛti. Puaa nduaa haa yɛ o kɛ kɛ fee ndoo nɔ lanɔɔ. O dimi niŋ, wanaa ŋɔmaa wa o yungu Nuuwa wo niŋ ni.

Mi Mɛlɛka dimul Nuuwa le tosaa wali ndoo tosa wɔ paandu loo. Mbo dimul ndu le mbo taŋgul dɛndɛ bɛndoo. Dɛndɔɔ hoo wa o bɛndu naŋ chaa dɛndɛ kua o mɛŋndaŋ choo wo ni. Wanaa che ndu pɛ aa kɔfu bɛndoo ni, kɛ ndoo hiou vɛlɛ kɔfoo bandei tɔ a le diiŋ. Mi Mɛlɛka dimul ndu aa: ‘Tosa ndu helɔɔ le yaa, nduyɛ ma kili kili ndu a lumuilaŋ kpɛ kpɛ.’ Lumuilaŋ ndaŋ la wa le Nuuwa a yungu ndɔɔ, a visiaa, vɛlɛa nyɛdiaa nda nɔ le dio wo.

Mi Mɛlɛka dimul vɛlɛ Nuuwa le mbo yikpa ndu leniŋ yɔŋi mɛŋndaŋ ma luɛi. Mi Mɛlɛka dimi aa: ‘I cho tosa mi mɛŋma bɛnduaŋ ma tɛɛmbuu chieeŋndo kpede. Wana o wana ve o dɛndɛ koŋ niŋ te, o cho wu.’

Mi Nuuwa nda puaa nduaa yaa wa diikuŋ Jɛhowa, okoŋ ma kandu dɛndɔɔ taŋgullo. Kɛ mamɔɔ kinɛi wanaa cheleŋnda wa nda ni. A wa vɛlɛ tuŋ hiowɔɔ lachi a sɔɔŋ wɔɔŋndoŋ tosaa. Mɛɛ Nuuwa wa nda dimullo a nyɛ Mɛlɛka nɔ le hunɔɔ tosaa wo okɔɔ, a laalaŋ ndu le.

O chua boondii vilɛi le dɛndɔɔ hoo chiiyo taŋgullo, kanifuule o wa bɔɔ. Mɛɛ wɔsila bɔɔ bɔɔ la hiou, ma chii ndu niŋ taŋgul yɔɔfɛɛ. Mi Mɛlɛka dimul Nuuwa le mbo luei visiaa o dɛndɔɔ niŋ. Mbo dimul ndu le mbo luei visiaa suulaŋ lapum a ŋiɔɔŋ ŋiɔɔŋ, o piaandoo a o laandoo. Kɛ suulaŋ lapum yɛ, mbo dimul ndu le mbo luei a ŋɔmmɛu ŋɔmmɛu. Mi Mɛlɛka dimul vɛlɛ Nuuwa le mbo luei youwaa suu o suu ko. Mi Nuuwa tosa mɛɛ mɛɛ Mɛlɛka dimul ndu yɛ.

Okoŋ kɔɔli, mi Nuuwa a yungu ndɔɔ bɛɛ luɛi o dɛndɛ kalaa niŋ. Mi Mɛlɛka baŋ nda dio kɔɔli peŋ. Mi Nuuwa a yungu ndɔɔ chal niko chumndo o dɛndɔɔ niŋ. Ŋ dimiŋndɔ niko maa, acho ichali a nda latulu chumndo o dɛndɔɔ niŋ. Vɛɛ ŋ wa yɛ yiyaŋ? Baa mɛŋma koŋgiaŋ maŋ ma huŋ niŋ pa kpeekpei a mɛɛ Mɛlɛka dimi yɛ?