NOVA chuan nupui pakhat leh fapa pathum a nei. A fapate hming chu Sema, Hama leh Japhetha an ni. Tin, chung fapate chuan nupui an nei theuh va. Tichuan Nova chhungkuaah chuan mi pariat an awm a.

Pathianin Nova chu thil mak tak a tihtir ta a. Lawng lian pui tuk turin a hrilh a. Chu lawng chu lawngpui anga lian a ni a, mahse thingrem lian pui, sei pui angin a lang. Pathian chuan, ‘Chhawng thumin siam la, a chhungah pindante siam ang che,’ a ti a. Pindante chu Nova leh a chhungte, ransate leh an vaia an ei tur mamawh tan a ni.

Pathian chuan Nova hnenah lawng chu tui lut thei lova siam turin a hrilh bawk a. Pathian chuan: ‘Tuilet tui nasa deuh thlentirin khawvel pum pui ka tiboral dawn. Lawnga awm lo mi zawng zawng an thi ang,’ a ti a.

Nova leh a fapate chuan Jehova thu an awih a, an tuk tan ta a. Mahse mi dangte chu an nui mai a. An tha lo reng a. Pathian thil tih tur chu Novan anmahni a hrilh a, tumahin an awih lo.

A len em avangin lawng tuk chhung chu a rei a. A tawpah, kum tam tak hnuah, tuk zawh a ni ta a. Pathianin lawnga ransate hruai lut turin Nova a hrilh ta a. Ransa chi thenkhat chu pahnih a pa leh a nu, hruai lut turin Pathianin a hrilh a. Mahse ransa chi dangte chu pasarih hruai lut turin Pathianin Nova a hrilh a. Pathianin Nova chu sava chi hrang zawng zawng hruai lut turin a hrilh bawk a. Nova chuan Pathian sawi ang chiah chuan a ti a.

A hnuah Nova leh a chhungte pawh lawngah an lut a. Tin Pathianin kawngka a khar a. A chhungah Nova leh a chhungte chuan an nghak a. Lawng chhunga an hnena awma nghak vein han inngaihtuah teh. Pathian sawi angin tuilet a awm tak tak ang em?