ATTOQ t-xuʼjil Noé kyukʼe oxe tkʼwaʼl. Sem, Cam ex Jafet kybʼi. Kyoxel tkʼwaʼl attoq kyxuʼjel. Tuʼntzunjo, attoq wajxaq kybʼet Noé tuj kyja.

Xi tqʼamaʼn Dios te Noé tuʼn tkubʼ tbʼinchaʼn jun matij ark. Maʼxixtaq, mo nintzkutaq, ark lu ik tzeʼn jun matij kaj ex nim tqan. ‹Bʼinchama te ox kol› (tres niveles) chi Dios te Noé, ex ‹bʼinchama elaʼ kwart tuj›. Aʼyeju kwart lu te Noétaq kyukʼe toj tja, ax ikx kyetaq txkup ex te tkubʼel kywa kykyaqil.

Xi tqʼamaʼn Dios te Noé tuʼn tkyaj bʼant-xix ark tuʼn, tuʼntzun miʼ tokx aʼ toj. Tzaj tmaʼn te kyjaʼ: ‹Ktzajel nqʼoʼne nim jbʼal twitz txʼotxʼ, tuʼntzun kynaj kykyaqil qeju itzʼ ex at xewbʼaj kyuj. Ex aju nya tokx tuj ark ok kkyimel›.

E ok ten Noé kyukʼe tkʼwaʼl bʼinchel ark ikxix tzeʼnj tzaj tqʼamaʼn Dios kye. Aqetzen txqantl xjal noq e jaw tzeʼn kyiʼj. Kukx kubʼ kybʼinchaʼnju mya bʼaʼn. Mi aʼlx jun xi ximinte qa tzulteq nim jbʼal ik tzaʼnj tzaj tqʼmaʼn Dios te Noé.

Tuʼnjo nintzku ark lu, xi tiʼn nim ambʼil tuʼn tbʼaj bʼinchet. Oteqxe tzikʼ nim abʼqʼi, tej tkyaj bʼent ark lu. Atzun jaʼle xi tqʼamaʼn Dios te Noé tuʼn kyokx tqʼoʼn txkup toj. Xi tqʼamaʼn te tuʼn kyokx tqʼoʼn kakabʼ kybʼet txkup tiʼj junjun wiq, tman ex ttxuʼ. Atzun kyiʼj txqantl txkup, xi tqʼamaʼn Dios te tuʼn kyokx tqʼoʼn wuq. Ax ikx xi tqʼamaʼn te Noé tuʼn kyokx tqʼoʼn tkyaqil wiq pichʼ (chʼit, mo chyuʼj). Bʼaj tbʼinchaʼn Noé ikxix tzeʼnj tzaj tqʼamaʼn Dios te.

Tbʼent jlu, ax ikx okx Noé kyukʼe tuj tja tuj ark. Oktzun tjupuʼn Dios ttziʼ ark kywitz. Tej ateʼkxtoq Noé kyukʼe toj tja tuj e ayon. Ximinxe, awte tokxa toj ark, nayone. ¿Okpetzulo tzultaq nim jbʼal ik seʼnj tzaj tqʼamaʼn Dios?