Noa Ark Kum Paskan
Sturka 9
Noa Ark Kum Paskan
NOA ba ai maîa bara luhpa waitna yuhmpa sin bri kan. Bara luhpia nani nina ba Sîm, Ham bara Jepet maki kan. Luhpia kumi bani ba ai maîa mairin kum bri kan. Baku bamna Noa pamalika ra upla 8 bara kan.
Nanara Gâd Noa ra win diara aihka kum daukbia. Ark tara kum paskbia win. Arkka ba duri tara kum baku kan, sakuna kau pali ba baks yari tara kum baku kan. Gâd mita Noa ra win ‘plur yuhmpa bara rûm nani sin bri kaka paskbia.’ Rûmka nani ba Noa, ai pamalika, daiwan nani bara plun auhbaia dukyara kan.
Bara Gâd mita Noa ra win ark ba li dimras satka paskbia. Gâd bila win: ‘Yang lisamra tara kum brih bal tasba aiska na sauhki tikaisna. Bara ya ark ba bilara apia sa kaka prubia.’
Noa ai luhpia nani aikuki Gâd bila kat wali mahka paski ta krikan. Sakuna upla wala nani ba lawaska kikaia baman kan. Ban saura bangwi kan. Noa mita Gâd dia daukaia luki kan ba witin nani ra win taim, kumi sin Noa ra kasak lukras kan.
Ark ba uba tara kan ba mita paski pyu ailal luan. Mani ailal luan bara, paski dan takan. Bara nanara Gâd mita Noa ra win daiwan nani ba arkka bilara dingkbia. Daiwan satka kum kum ba wainhka bara mairin 2 dingkbia win. Sakuna daiwan satka wala nani ba 7 dingkbia win. Bara tnawira nani satka ailal ba sin dingkaia. Bara Noa Gâd dia win ba kat daukan.
Ningkara, Noa bara ai pamalika ba sin ark ra diman. Baha wina Gâd mita durka prakan. Noa ai pamalika aikuki ark bilara dimi bila kaiki bangwan. Man sin witin nani aikuki bila kaikisma baku damra wals. Bara luks, rait pali Gâd win ba baku lisamra tara kum bri balbia ki?
