NOA ua kele na mpueyeni na vana veni vatatu. Mazina a vana veni akeo Seme, Hame na Yafete. Vose ava vana veni va kele na vampuevo vavo. Ngeci mukemuo, vusoko vua Noa vua puile vua vantu vatanu na vatatu.

Njambi ua tumine Noa ku panga cipanga ca ku komouesa. Ua mu lekele ku tunga vuato. Vuato vuaco vua puile vua kama ngue mbapolo, vunoni vua monekele ngue cikasa ca kama ca laha. Njambi ua mu lekele ngueni ‘a vu tunge mu cifua ca vindzivo vitatu via ku litumbakana kaha na ku tepa vihondo mukati.’ Vihondo viaco via puile via Noa na vusoko vueni, na tusitu na via-ku-lia vi va lisukile mu vuato.

Njambi ua lekele naua Noa ku sota vuato linga mema kati a kovelemo. Njambi ua handekele ngueni: ‘Nji ka neha livazi lia kama mu ku nongesa mavu ose. Uose ka ka kovela mu vuato a ka tsa.’

Noa na vana veni vononokele Yehova kaha va putukile ku songa vuato. Vunoni vantu va kele na ku va zola. Va tualeleho ku linga vupi. Omo Noa ua va nanguile viuma via sikile Njambi, na umo uahi ua mu tavele.

 Ku tunga vuato, ca ambatele miaka ya ingi muomu vua puile vua kama cikuma. Mu nima ya miaka ya ingi vuato vua huile. Njambi ua lekele Noa linga a kovelese tusitu mu vuato. Ua mu lekele naua ngueni a kovelesemo tusitu vavali vavali va ku lifua nkomba na luhavo. Vunoni vifua vimo via tusitu ua mu tumine a kovelesemo vatanu na vavali. Njambi ua lekele Noa ku kovelesamo tuzila vose va kuli seza-seza. Noa ua lingile viose via mu tumine Njambi.

Munima ya viose, Noa na va vusoko vueni va kovelele mu vuato. Kaha Njambi ua sokele ku lipito. Noa na vavusoko vueni va kele na ku lavelela mu kati. Aci singanieke honi nga nove ua kele mu kati ka vuato mu ku lavelela hamo navo. Vuno livazi li keza mpundu ngue mua sikile Njambi ni?