Noa Okwombeka Obwato
Ekitebyo 9
Noa Okwombeka Obwato
NOA akaba aine omukazi hamwe n’abaana bashatu b’aboojo. Amaziina g’abatabani ni Sheemu, Haamu na Yafeesi. Kandi buri mutabani akaba aine omukazi. N’ahabw’ekyo, omu ka ya Noa hakaba harimu abantu munaana.
Ruhanga hati agambira Noa kukora ekintu ekitari kya buriijo. Akamugambira kwombeka obwato buhango. Obwato obu bukaba buri buhango nk’emeeri, kwonka bukaba nibushusha nk’ekishanduuko kihango kandi kiraingwa. ‘Butemu kaanyinaishatu,’ nikwo Ruhanga yaagizire, ‘kandi obutemu ebishengye.’ Ebishengye bikaba biri ebya Noa n’eka ye, n’enyamaishwa hamwe n’eby’okurya ebi boona baabaire nibaija kwetenga.
Ruhanga kandi akagambira Noa okubukora kurungi kugira ngu amaizi gatabutaahamu. Ruhanga akagira ati: ‘Ninza kwohereza omwegyemure gw’amaizi maingi kandi mpwerekyereze ensi yoona. Buri muntu otari mu bwato naija kufa.’
Noa n’abatabani bakoorobera Yehova kandi baatandika kwombeka. Kwonka abantu abandi baatandika kusheka kwonka. Baagumizamu kuba babi. Tihaine n’omwe owaikiriize Noa ku yaabagambiire eki Ruhanga yaabaire naaza kukora.
Okwombeka obwato kukatwara obwire buraingwa ahakuba bukaba buri buhango munonga. Aha muheru, bwanyima y’emyaka mingi, bukahwa kwombekwa. Hati Ruhanga yaagambira Noa kutaatsya enyamaishwa omu bwato. Aha miringo y’enyamaishwa ezimwe, Ruhanga akamugambira kutaatsyamu ibiri-ibiri, zombi enshaija n’enkazi. Kwonka aha miringo endiijo ey’enyamaishwa, Ruhanga akagambira Noa kutaatsyamu mushanju. Ruhanga kandi akagambira Noa kutaatsyamu emiringo yoona ey’ebinyonyi. Noa yaatwaza nk’oku Ruhanga yaagambire.
Bwanyima, Noa n’eka ye nabo baataaha omu bwato. Ruhanga atyo yaakinga orwigi. Omu bwato, Noa n’eka ye bakategyereza. Kare naiwe yeshushanirize ngu ori nabo omu bwato, otegyereize. Kwokwo omwegyemure gukaabaireho nk’oku Ruhanga yaagambire?
