NOAH garem wanfala waef and thrifala son. Nem bilong olketa son hem Shem, Ham and Jaʹpheth. Each wan long thrifala son hia garem waef. So eitfala pipol nao insaed long famili bilong Noah.

God mekem Noah duim difren samting. Hem talem hem for buildim wanfala big ark. Disfala ark hem olsem bigfala ship, bat hem luk olsem big, longfala box. God hem sei: ‘Buildim datwan thri story hae, and mekem olketa rum insaed.’ Olketa rum hem for Noah and famili bilong hem, olketa animal, and kaikai wea olketa bae needim.

God talem Noah for wakem disfala ark mekem no eni wata go insaed tu. God sei: ‘Mi bae sendem wanfala big flood bilong wata and finisim full world. Evriwan wea no stap insaed long ark bae dae.’

Noah and olketa son bilong hem obeyim Jehovah and start for build. Bat olketa pipol laflaf nomoa. Olketa gohed for duim nogud samting. No eniwan bilivim Noah taem hem talem olketa samting wea God bae duim.

Hem tek longfala taem for buildim ark. Bihaen plande year, hem finis. Then God talem Noah for tekem olketa animal long ark. For samfala animal God sei for tekem tufala, man wan and mere wan. Bat for narakaen animal, God talem Noah for tekem sevenfala. God talem Noah for tekem evri difren kaen bird tu. Noah duim evri samting wea God talem.

Bihaen, Noah and famili bilong hem tu go insaed ark. Then God satem door. Noah and famili bilong hem weit. Tingim sapos iu stap insaed long ark witim olketa, and iufala weit. Waswe, wanfala flood bae really kam olsem God talem?